Rodos - Pas një hetimi paraprak shterues që u krye mbrëmjen e së hënës,  një pronar hoteli  53 vjeç në Kalithea ka pranuar se e ka vrarë ai, biznesmenin shqiptar të ndërtimit, Xhani Topallin, 46 vjeç, banues në Faliraki, i martuar, baba i tre fëmijëve të mitur.

Vrasësi  kishte pasur një takim me të të dielën e datës 28 gusht 2022 në mbrëmje, për t'i dhënë atë që i takonte sipas marrëveshjes që kishin bërë.

Trupi i pajetë i 46-vjeçarit është gjetur në një rrugë të shkretë mes Psinthos dhe Afantos, ndërsa dosja do t'i kalojë sot Prokurorisë Publike për procedim të mëtejshëm.

Informacione më të reja nga “Demokrati” raportojnë se vdekja është shkaktuar nga mbytja me litar, ndërsa për bashkëpunim është arrestuar edhe djali i autorit , 20 vjeç, pasi dyshohet se e ka ndihmuar në transferimin e trupit!

Tashmë priten njoftime  të tjera nga Policia greke ELAS.

Sipas informacioneve të sigurta të “Demokratit”, pas të gjitha të dhënave që kanë dalë deri tani nga depozitimet, kontrolli i video-incizimeve nga kamerat e vëzhgimit të dyqaneve dhe shenjat, pasditen e djeshme pritej të pyetej personi i parë për sqarim ndaj sjelljeve kontradiktore që kishin lindur.

Ka rezultuar se 46-vjeçari është parë nga një kamerë sigurie në kioskë në orën 22:28 të së dielës duke blerë cigare dhe duke folur intensivisht në celular me një të panjohur.

Policët e Nëndrejtorisë së Sigurisë Rodos kanë marrë gjurmët e gishtave në makinën e 46-vjeçarit, markë Honda CRV 4×4, ngjyrë blu, e cila u gjet me xhamat e hapur dhe pa çelësa në Kalithe në një pikë  mermeri të zonës.

Tashmë ka nisur procesi i ekzaminimit të ADN-së së mbledhur nga punonjësit e policisë, brenda makinës dhe dje në mesditë pritej që të merrej kampion nga gruaja dhe vëllai i viktimës për t'i përjashtuar nga pjesa tjetër e mostrave që janë identifikuar.

Është jashtëzakonisht interesant fakti që policia ka konstatuar se deklarata e dhënë nga një ushtarak, i cili ka parë makinën e viktimës me të dhe dy persona të tjerë në të në vendin e ngjarjes ku ajo është gjetur e braktisur në orët e para të mëngjesit të së hënës së 29 gushtit 2022, ishte më e besueshme.

Kujtojmë se celulari i viktimës ishte i heshtur që nga mbrëmja e së dielës, gjë që i ka vënë këta dy persona në qark si të dyshuar dhe për këtë arsye është kërkuar identiteti i tyre si dhe arsyet që kanë qenë me të dhe ata nuk u paraqitën për të dhënë një deklaratë.