Dëshmia e një personi se Davide Pecorelli ishte i gjallë, i ka dhënë fund farsës së biznesmenit italian i cili prej më shumë se 9 muaj qëndronte i fshehur, pa pasur asnjë kontakt me familjarët e tij dhe duke bërë të gjithë të besojnë se kishte humbur jetën në Pukë. Mediat italiane bëjnë të ditur se hetuesit e çështjes kishin zbuluar më parë shenja të cilat tregonin se ai ishte i gjallë.

Madje kryeprokurori, Raffaele Cantone dhe Zëvendësprokurori Giuseppe Petrazzini kishin deklaruar se ata kishin dëshminë e një personi i cili kishte deklaruar se e kishte parë Pecorellin të gjallë.

Biznesmeni italian kishte inskenuar vdekjen e tij tragjike në Pukë, ku kishte djegur makinën të cilën e kishte marrë me qira dhe në të cilën ishin gjetur disa eshtra.

Të dhënat e fundit për Pecorellin ishin disa mesazhe që ai i kishte shkëmbyer me një mik, në të cilin ai theksonte se ai gjendej në Shqipëri për të negociuar me bizneset vendase. 

Historia e zhdukjes së mistershme të biznesmenit italian Davide Pecorelli në Shqipëri dhe gjetja e tij plot 9 muaj më vonë ka sjellë edhe njëherë në qendër të vëmendjes një fenomen tejet të njohur në Itali, në veçanti nga biznesmenët të cilët janë në prag të falimentimit, atë të mashtrimit për të përfituar nga siguracionet.

Shumë persona për të përfituar nga siguracionet dhe duke përfituar edhe nga lehtësirat në Kodin Civil,  humbasin të gjitha kontaktet me familjarët e tyre dhe kështu pas 10 vitesh mund të arrihet në marrjen e deklaratës së vdekjes së supozuar. Një deklaratë e tillë mund të merret vetëm pas dhjetë vitesh nga dita e fundit kur është deklaruar i zhdukur.