Heqja e implanteve të gjirit po bëhet gjithnjë e më e zakonshme

Në shkurt të vitit 2026, ish-ylli i realityshow-ve Brandi Glanville lejoi që operacioni për heqjen e implanteve të gjirit të filmohej për një emision televiziv. Ajo tha se vuante nga lodhje, dhimbje të kyçeve dhe simptoma të tjera. Gjatë ndërhyrjes, kirurgët zbuluan se njëri implant, i vendosur 20 vjet më parë, kishte rrjedhur, ndërsa tjetri ishte çarë.

Glanville u bashkohet personazheve të njohur si Alyssa Milano, Michelle Visage dhe Chrissy Teigen, të cilat kanë folur publikisht për heqjen e implanteve. Kjo procedurë është bërë gjithnjë e më e përhapur që nga viti 2020. Sipas Shoqatës Amerikane të Kirurgëve Plastikë, atë vit zmadhimi i gjoksit ra me 14,9%, ndërsa operacionet për heqjen e implanteve u rritën me 34,4%. Rritja vazhdoi edhe gjatë vitit 2023.

Gratë zgjedhin t'i heqin implantet për arsye shëndetësore, si ngurtësimi i indit rreth implantit, çarja e tij, dhimbjet e shpinës ose reagimet autoimune, por edhe për arsye estetike. Probleme të tilla janë raportuar që kur implantet dolën në treg në vitet 1960.

Në vitet 1990, një padi kolektive kundër kompanisë Dow Corning përfundoi me një dëmshpërblim prej 2,35 miliardë dollarësh. Në vitin 1992, Administrata Amerikane e Ushqimit dhe Barnave (FDA) kufizoi përdorimin e implanteve me silikon, por ndalimi u hoq në vitin 2006. Megjithëse shqetësimet vazhdojnë, përfshirë atë që shumë e quajnë "sëmundja e implanteve të gjirit", implantet mbeten të njohura. Megjithatë, rritja e operacioneve për heqjen e tyre tregon jo vetëm shqetësime shëndetësore, por edhe një ndryshim kulturor në mënyrën se si perceptohet madhësia e gjoksit.

Ndryshimi i idealeve të trupit

Sipas Victoria Pitts-Taylor nga Universiteti Wesleyan, mënyra se si njerëzit e ndryshojnë trupin ndjek ciklet e modës.

Që nga shekulli i 19-të, madhësia e gjoksit është konsideruar një simbol statusi. Gjatë Epokës së Artë, korseja krijonte figurën në formë ore rëre, duke treguar se një grua i përkiste shtresës së pasur. Në fillim të shekullit të 20-të, katalogët reklamonin pajisje dhe kremra që premtonin zmadhimin e gjoksit.

Në vitet 1920 u bë modë silueta më e hollë, megjithëse gratë vazhdonin të përdornin veshje formësuese. Në të njëjtën kohë, kirurgjia plastike filloi të fitonte popullaritet falë përparimeve të arritura në rindërtimin e fytyrës dhe trupit pas Luftës së Parë Botërore.

Pas Luftës së Dytë Botërore, moda u frymëzua nga yje si MarilynMonroe dhe Jayne Mansfield. Sutjenat me mbushje dhe modeli i famshëm "bulletbra" u bënë jashtëzakonisht të njohura. Madje, një artikull i revistës Cosmopolitan në vitin 1956 pretendonte se mungesa e gjoksit mund ta shtynte një adoleshente drejt vetëvrasjes.

Silikoni, i zhvilluar fillimisht për përdorim industrial, u bë më pas zgjidhja kirurgjikale për zmadhimin e gjoksit dhe filloi të përdorej gjerësisht në mesin e viteve 1960.

Shqetësimet për shëndetin

Komplikacionet u shfaqën pothuajse menjëherë. Një artikull i revistës Ms. në vitin 1978 sugjeronte, bazuar në intervista të kufizuara, se deri në 60% e grave përjetonin probleme pas vendosjes së implanteve. Megjithatë, FDA i klasifikoi implantet si pajisje me rrezik të moderuar, pa kërkuar prova të plota sigurie.

Gjatë viteve 1980 u ngritën shumë padi. Në vitin 1992, një dokument i brendshëm i kompanisë Dow Corning tregoi se kompania kishte qenë prej kohësh në dijeni se xheli i silikonit mund të rridhte nga implantet. Kjo çoi në ndalimin e përkohshëm të implanteve me silikon, megjithëse ato vazhduan të përdoren për disa paciente.

Implantet me solucion fiziologjik zunë vendin e tyre, por edhe ato sollën probleme. Një studim i FDA-së në vitin 2000 zbuloi se 21% e pacienteve kishin nevojë për një operacion tjetër brenda tre vjetësh.

Megjithatë, zmadhimi i gjoksit mbeti procedura estetike më e kryer në SHBA nga viti 2006 deri në vitin 2020.

Rrjetet sociale dhe kultura e mirëqenies

Viti 2020 shënoi një kthesë të rëndësishme. Sipas kirurgut plastik Lu-Jean Feng, rrjetet sociale u kanë dhënë pacienteve mundësinë të ndajnë përvojat dhe komplikacionet për të cilat shpesh nuk ishin informuar nga mjekët.

Grupi në Facebook Breast Implant Illness Research & Recovery, i krijuar nga Nicole Daruda, u rrit nga rreth 500 anëtarë në vitin 2015 në afro 80.000 sot. Ai ndihmoi në përhapjen e termit "sëmundja e implanteve të gjirit", që përfshin simptoma si lodhja kronike, çrregullimet autoimune dhe vështirësitë në përqendrim.

FDA vazhdon të thotë se nuk ka prova përfundimtare që implantet me silikon shkaktojnë sëmundje, por studimet janë ende të kufizuara dhe shumë prej tyre kanë humbur një numër të madh pjesëmarrësesh gjatë ndjekjes.

Përveç shqetësimeve shëndetësore, rrjetet sociale kanë ndryshuar edhe idealin e bukurisë. Pamja me ndërhyrje të dukshme estetike, shumë e përhapur në vitet 2000, po zëvendësohet nga një stil më natyral dhe më i përmbajtur.

Sipas autores Emily Kirkpatrick, kjo prirje lidhet me konceptin e "luksit të heshtur", ku statusi nuk tregohet më përmes ndryshimeve të dukshme, por përmes mundësisë për të bërë ndërhyrje të vazhdueshme, delikate dhe madje për të korrigjuar procedurat e vjetra.

Si pasojë, ndërhyrje si heqja e implanteve, ngritja e gjoksit ose zmadhimi me dhjamë të trupit po reklamohen gjithnjë e më shumë si pjesë e mirëqenies dhe kujdesit për shëndetin, e jo thjesht si procedura estetike.

Megjithatë, edhe pse ideali i sotëm favorizon një gjoks më të vogël, kjo nuk do të thotë domosdoshmërisht se pamja është më natyrale. Edhe ky stil kërkon investime të konsiderueshme financiare dhe mirëmbajtje të vazhdueshme. / National Geographic – Syri.net