Sharon Stone rikthehet në pasarelë pas më shumë se 30 vitesh, parakalon për Vetements në Paris

Aktorja e njohur hollivudiane Sharon Stone është rikthyer në pasarelë për herë të parë pas më shumë se tre dekadash, duke surprizuar publikun në sfilatën e koleksionit të veshjeve për meshkuj Pranverë/Verë 2027 të Vetements, në kuadër të Javës së Modës në Paris.

68-vjeçarja u ngjit në pasarelë më 26 qershor, e veshur me një xhaketë të bardhë oversize, këmishë me jakë të zezë, kravatë të bardhë dhe çizme të zeza prej lateksi mbi gju. Pamjen e kompletonte modeli i saj karakteristik i flokëve biondë, të stiluar thjesht dhe të mbledhur pas veshëve.

Ky ishte rikthimi i parë i Stone në një sfilatë mode që prej vitit 1993, kur ajo mbylli sfilatën Pranverë/Verë 1994 të Valentino gjatë Javës së Modës në Paris. Në atë kohë, aktorja parakaloi me një fustan të bardhë të shkurtër, geta dantelle dhe një kapelë elegante me vello të gjatë.

Sharon Stone ka pasur një miqësi të ngushtë me stilistin legjendar Valentino Garavani. Pas ndarjes së tij nga jeta në fillim të këtij viti, aktorja publikoi një mesazh prekës në rrjetet sociale, ku e falënderoi për talentin, vizionin dhe miqësinë e tij.

Përveç rikthimit në botën e modës, Stone ishte së fundmi pjesë e sezonit të tretë dhe të fundit të serialit “Euphoria” të HBO. Në intervistat e fundit, ajo e ka cilësuar produksionin si “serialin më të mirë në televizion”, duke theksuar se çdo prind dhe çdo shkollë e mesme duhet ta shohë, pasi trajton me realizëm sfidat me të cilat përballen të rinjtë.

Rikthimi i Sharon Stone në pasarelë u prit me entuziazëm nga publiku dhe industria e modës, duke dëshmuar se ikona e “Basic Instinct” vazhdon të mbetet një nga figurat më karizmatike të skenës ndërkombëtare.