Si mund t’u mësojnë europianët jugorë veriorëve se si të përballojnë vapën

Në Spanjë, Itali dhe Greqi, njerëzit kanë përvojë të madhe me motin jashtëzakonisht të nxehtë. Ata kanë shumë për të ndarë me fqinjët e tyre nga veriu, të cilët e kanë më të vështirë të përballojnë të nxehtin, nga gjërat që duhet të shmangin deri te mënyra se si të planifikojnë ditën e tyre.

Grekët nuk reshtin së habituri nga ajo që vizitorët nga veriu bëjnë nën diell.

Turistët lëvizin me nxitim nën diellin përvëlues pa kapelë. Disa pinë birrën e parë në orën 11 të mëngjesit ose edhe më herët. Të tjerë kalojnë orë të tëra në plazh, duke përfunduar me lëkurë të djegur dhe të skuqur.

Ndërsa valët e të nxehtit po çojnë temperaturat në nivele rekord në Europën Qendrore dhe Veriore, shumë njerëz po shohin drejt jugut për këshilla se si të mbijetojnë në motin e nxehtë.

Rreziqet e goditjes nga nxehtësia

Disa turistë kanë humbur jetën nga goditja e nxehtësisë në Greqi gjatë viteve të fundit. Shumë prej tyre nuk i kuptojnë rreziqet që sjell ecja në vapën e mesditës.

Kur temperatura është 37 gradë Celsius në hije, ajo në rrezet e drejtpërdrejta të diellit mund të arrijë lehtësisht në 60 gradë. Mjekët grekë paralajmërojnë se dehidratimi mund të ndodhë shumë shpejt. Rreziku i goditjes nga nxehtësia është i lartë, veçanërisht për të moshuarit.

Kur pësoni goditje nga nxehtësia, mund të ndiheni të hutuar dhe të çorientuar. Simptoma të tilla kanë çuar vazhdimisht në aksidente fatale, veçanërisht në zona të izoluara për ecje, ku njerëzit kanë humbur rrugën, nuk kanë qenë në gjendje të kërkojnë ndihmë me telefon dhe nuk janë gjetur në kohë.

Grekëve nuk do t’u shkonte kurrë në mendje të bënin një shëtitje apo ecje gjatë orëve të nxehta të mesditës. Në mes të ditës, shumë prej tyre pushojnë në dhoma të errësuara – idealisht pasi e kanë freskuar mirë ambientin me ajër të kondicionuar. Gjatë valëve të të nxehtit, njerëzit i mbajnë grilat e mbyllura gjatë gjithë ditës.

Emergjencat në Gadishullin Iberik

Turistët nga Europa Veriore që shkojnë në Spanjë dhe Portugali shpesh e nënvlerësojnë fuqinë e vapës ekstreme prej rreth 40 gradësh dhe intensitetin shumë më të madh të rrezeve të diellit.

Megjithatë, këto kushte mund të bëhen shpejt kërcënuese për jetën, veçanërisht për fëmijët dhe të moshuarit.

Në Majorka, një ishull shumë i frekuentuar nga pushuesit, ekipet e ndihmës së shpejtë thirren vazhdimisht për të trajtuar persona që vuajnë nga probleme të shkaktuara nga nxehtësia.

Disa nisen për ecje gjatë periudhës më të nxehtë të vitit, pa ujë dhe me shapka në vend të këpucëve. Nëse humbasin rrugën, mund të gjenden në rrezik.

Të tjerë nga vendet më të ftohta digjen nga dielli që ditën e dytë të pushimeve, pasi nuk janë mësuar me motin dhe nuk përdorin mjaftueshëm krem mbrojtës ose një krem me faktor të mjaftueshëm mbrojtjeje.

Banorët vendas shkojnë në plazh në mëngjes dhe kthehen në shtëpi rreth orës 10:00, ose shkojnë vetëm në mbrëmje pas orës 18:00, duke shmangur orët më të nxehta ndërmjet tyre.

Ndërsa pushuesit qëndrojnë në plazh, spanjollët dhe portugezët bëjnë siestë kur kanë mundësi. Shumë dyqane mbyllen gjatë kësaj periudhe të ditës.

Por turistët priren ta organizojnë ditën njësoj si në vendet e tyre më të freskëta, madje bëjnë edhe çiklizëm ose vrap gjatë orëve më të nxehta.

Këshilla e vendasve është të konsumohen vakte të lehta gjatë ditës dhe të shmangen baret turistike që tërheqin vizitorët me ‘ushqim të gatuar si në shtëpi’, si fish and chips apo shnicel. Vendasit zakonisht nuk e hanë vaktin kryesor para orës 21:00.

Hidratimi është thelbësor

Në Itali, njerëzit mbështeten te shumë zakone të vogla të përditshme, duke filluar me qëndrimin e hidratuar.

Temperaturat shpesh arrijnë rreth 35 gradë gjatë periudhës më të nxehtë të vitit dhe njerëzit përdorin shumë çezma publike me ujë të pijshëm në qytete. Romakët shkojnë te ‘nasoni’, çezma me ujë të pijshëm ku mund të mbushin ujë dhe të freskojnë për pak çaste duart ose kyçet. Ata ndalojnë shkurtimisht, pijnë disa gllënjka dhe vazhdojnë rrugën.

Njerëzit gjithashtu kërkojnë instinktivisht hijen, duke zgjedhur me kujdes rrugët për të shmangur qëndrimin nën diellin përvëlues.

Në përgjithësi, italianët i planifikojnë me kujdes aktivitetet e përditshme, duke shmangur angazhimet gjatë orëve të nxehta të mesditës dhe duke pushuar në vend të tyre. Shumica e fshatrave dhe qyteteve gjallërohen sërish vetëm kur temperaturat bien në mbrëmje.

Kërkoni freski

Francezët e kanë bërë rregull lagien e lëkurës kur jashtë është vapë. Shishet spërkatëse gjenden gjerësisht në farmaci dhe madje edhe kompanitë e sigurimeve shëndetësore rekomandojnë lagien e fytyrës dhe parakrahëve disa herë në ditë.

Sapo dilni nga shtëpia, duhet të merrni me vete një shishe të vogël spërkatëse me ujë, krahas shishes së zakonshme të ujit, nëse është e mundur. Këto shishe të vogla shihen shpesh si në rrugë ashtu edhe në ambiente të mbyllura.

Francezët spërkasin fytyrën disa herë, si dhe freskojnë pjesën e pasme të qafës, krahët dhe këmbët. Shumë prej tyre spërkasin pak edhe majtas e djathtas, duke ndarë pak freski me të tjerët./ DPA News