Kate, Princesha e Uellsit, ka prezantuar një seri të re filmash të animuar që synojnë mbështetjen e zhvillimit social dhe emocional të fëmijëve të vegjël.

Filmat janë publikuar në YouTube dhe janë krijuar për t’u përdorur nga familjet, organizatat bamirëse dhe profesionistët e edukimit të hershëm, nëpërmjet Qendrës së Fondacionit Mbretëror për Fëmijërinë e Hershme.

Seria përfshin një film kryesor dhe gjashtë pjesë shpjeguese, të disponueshme gjithashtu në gjuhën uellsiane dhe me përkthim në gjuhën britanike të shenjave. Projektit i është kushtuar rëndësi e veçantë nga vetë Princesha, e cila gjatë qershorit mori pjesë në një seminar krijues me ilustruesit dhe ekspertët që kontribuuan në realizimin e filmave.

“Fëmijëria e hershme është mundësia e artë për të ndërtuar themelet e forta për shëndetin dhe lumturinë në të ardhmen”, u shpreh Princesha. Ajo theksoi rëndësinë e ndërveprimeve të dashura mes të rriturve dhe fëmijëve, që ndihmojnë në formimin e aftësive thelbësore për jetë.

Pavarësisht se aktualisht ndodhet në një periudhë pushimi nga detyrat mbretërore pas përfundimit të kimioterapisë, Princesha e Uellsit vazhdon të angazhohet përmes nismave që synojnë përmirësimin e shëndetit dhe mirëqenies së brezave të rinj.