Presidentja e Kosovës, Vjosa Osmani, ka ndarë një moment të veçantë me ndjekësit e saj në rrjetet sociale, duke shpërndarë lajmin se me dekret presidencial i ka dhënë shtetësinë e Republikës së Kosovës këngëtares me famë botërore, Dua Lipa.

Në postimin e saj në Facebook, Osmani e cilëson Duan si një nga figurat më të rëndësishme kulturore dhe artistike në historinë e vendit, ndërsa i uron mirëseardhjen “në shtëpi”, duke theksuar lidhjen e pandashme mes këngëtares dhe Kosovës.

Postimi i plotë:

"Mirë se erdhe në shtëpi, Dua! ❤️ Nder i veçantë që sot, me dekret presidencial, t'ia jap shtetësinë e Republikës së Kosovës, Dua Lipës, një prej personaliteteve më të rëndësishme kulturore dhe artistike në historinë e vendit tonë. Dua dhe Kosova kanë qenë gjithmonë të pandashme. Ajo ka qenë dhe vazhdon të jetë një nga zërat më të fuqishëm në skenat më të mëdha të botës, duke bërë histori me të arriturat e saj dhe duke u shndërruar në inspirim për miliona njerëz anekënd globit. Mirënjohja jonë është e pafund për gjithçka që Dua ka bërë dhe vazhdon të bëjë për Kosovën, për rininë tonë, për artin tonë dhe për imazhin ndërkombëtar të vendit tonë. Dua, Kosova është gjithmonë krenare me ty!"