Vdes DJ italian në rrethana të dyshimta, babai akuzon policinë për dhunë fatale

Një ngjarje e rëndë sa edhe e mistershme ka tronditur botën e muzikës elektronike dhe opinionin publik në Itali.

Mediat italiane shkruajnë se DJ dhe producenti, Michele Noschese, i njohur me emrin artistik “Godzi”, ka ndërruar jetë në rrethana ende të paqarta në Ibiza, Spanjë. Ngjarja e rëndë thuhet se ka ndodhur gjatë natës mes 18 dhe 19 korrikut, e ai ishte vetëm 35 vjeç.

Lajmi është konfirmuar nga familjarët dhe është përhapur me shpejtësi në rrjetet sociale dhe mediat e specializuara në muzikë techno, ku shumë artistë dhe ndjekës kanë shprehur dhimbjen e thellë për humbjen e një talenti të njohur në skenën ndërkombëtare.

Sipas burimeve mediatike dhe dëshmive të para, dyshohet se Guardia Civil spanjolle mund të jetë përfshirë në incidentin që çoi në vdekjen e DJ-t.

Sipas një versioni, policia ndërhyri në një festë private të organizuar nga Noschese në shtëpinë e tij në Ibiza, pas ankesave për zhurmë nga fqinjët. Aty dyshohet se ndodhi një konflikt fizik mes forcave të rendit dhe Noschese, i cili më pas humbi jetën.

Burime pranë autoriteteve spanjolle kanë pohuar se vdekja mund të jetë shkaktuar nga një arrest kardiak pas konsumit të alkoolit dhe substancave narkotike, por kjo mbetet për t’u verifikuar.

Giuseppe Noschese, babai i Michele-s, një mjek dhe ish-primar, ka dorëzuar një padi për vrasje të qëllimshme ndaj policisë në prokurorinë spanjolle.

Në një intervistë për “La Repubblica”, ai deklaroi:

“Ka pasur një rrahje brutale nga ana e policisë. Festa përfundoi me një konflikt dhe më pas arrestimin e djalit tim. Një nga djemtë që ishte në shtëpi, u zgjua dhe pa gjithçka: Michele po goditej nga agjentët. Ai ishte një sportist, në gjendje të shkëlqyer fizike dhe shëndetësore. Dy gjëra janë të padiskutueshme: djali im ndërroi jetë ndërsa ishte nën kujdesin e policisë dhe nuk u dërgua në spital, por drejt e në morg”.