Selena Gomez prek fansat me fjalët për ditëlindjen e saj

Selena Gomez, këngëtarja, aktorja dhe producentja e njohur, ka festuar sot ditëlindjen e saj të 33-të dhe e ka shfrytëzuar këtë moment të veçantë për të ndarë një mesazh emocionues me ndjekësit e saj në Instagram.

Në postimin e saj të fundit, Selena reflektoi mbi rrugëtimin e saj deri më tani dhe e cilësoi vitin që lamë pas si më të bukurin e jetës së saj. “Ndërsa përgatitem të festoj ditëlindjen time të 33-të, nuk mund të mos reflektoj mbi udhëtimin e jashtëzakonshëm që më ka sjellë deri këtu. Ky vit që shkoi ka qenë vërtet viti më i bukur i jetës sime, dhe për këtë, ju jam thellësisht mirënjohëse të gjithëve ju,” shkroi ajo.

Selena nuk harroi të falënderojë të gjithë ata që kanë qenë pranë saj në çdo hap — qofshin ata që e kanë mbështetur nga larg apo që kanë ndarë momentet më të vështira dhe të bukura me të. “Jam thellësisht e përulur dhe pafundësisht mirënjohëse për gjithë dashurinë tuaj,” shtoi ajo në postim.

Duke shikuar përpara, ylli i muzikës dhe televizionit shprehu emocionet dhe shpresat për vitin që vjen: “Jam e mbushur me emocion dhe shpresë për atë që do të vijë. Mezi pres të ndaj më shumë momente me ju, të krijoj kujtime të reja dhe të vazhdojmë këtë udhëtim të bukur së bashku.”

Postimi u mbyll me një shpërthim dashurie tipike të Selenës për fansat e saj: “Ju dua të gjithëve ÇMENDURISHT!”