Netflix ka anuluar zhvillimin e serialit të animuar “Pearl” të krijuar nga Meghan Markle, në përpjekje për të ulur kostot për shkak të rënies së mprehtë të numrit të abonentëve.

Seriali, i cili u shpall vitin e kaluar, është një nga disa projekte nga të cilat gjigandi i transmetimit ka hequr dorë. Muajin e kaluar, Netflix zbuloi një rënie të mprehtë të abonentëve dhe paralajmëroi se miliona përdorues të tjerë do të largoheshin gjithashtu nga platforma.

Kjo fshiu mbi 50 miliardë dollarë të vlerës së tregut të kompanisë pasi ekspertët paralajmëruan se po përballej me një luftë për t'u rikthyer në rrugën e duhur.

Archewell Productions, një kompani e themeluar nga Duka dhe Dukesha e Sussex, njoftoi vitin e kaluar se Meghan do të jetë producentja ekzekutive e serialit "Pearl".

Seriali është planifikuar të fokusohet në aventurat e një vajze 12-vjeçare, e cila është frymëzuar nga femrat me ndikim të historisë.

Netflix, megjithatë, ka konfirmuar se do të vazhdojë të punojë në një numër projektesh me Archewell Productions, duke përfshirë një seri dokumentare të quajtur "Heart of Invictus".

Seria do të fokusohet në atletët që konkurrojnë në Lojërat Invictus për Veteranët e Lënduar, një ngjarje e themeluar nga Princi Harry në Hagë në 2022.

Netflix gjithashtu ka informuar publikun për anulimin e dy serialeve të animuar për fëmijë "Dino Daycare" dhe "Boons and Curses".