Gjatë janarit emigrantët dërguan në Kosovë 84.6 milionë euro. Brenda të njëjtit muaj qytetarët morën mbi 137 milionë euro kredi, ndësa kursyen edhe 90.4 milionë euro si depozita në banka.  

Qytetarët e Kosovës po vazhdojnë të jenë të varur nga kreditë dhe remitancat.

Banka Qendrore e Kosovës ka publikuar disa të dhënë për muajin janar, duke treguar se sa është vlera e kredive të marra nga qytetarët, por edhe sa para dërguan emigrantët në Kosovë.

Mbi 84 milionë euro është vlera remitencave të mërgatës që janë dërguar në Kosovë për muajin janar 2024.

Kurse, vlera e tyre deri në fund të vitit 2023 ishte 1 miliard e 343 milionë euro.

Sipas raportit, prurjet më të mëdha të remitancave kanë qenë nga institucionet financiare jo-bankare me pjesëmarrje prej 63.3%, pasuar nga bankat me 19.4% dhe kanalet tjera 17.3%.

Banka Qendrore e Kosovës (BQK) ka njoftuar se në janarin e këtij viti bankat në Kosovë lëshuan kredi në vlerë të 137.9 milionë eurove.

Në raportin e publikuar të enjten, BQK-ja njoftoi se 90.4 milionë euro është vlera e depozitave, ndërsa 7.36 miliardë euro vlera e aseteve bankare.

“Ndërsa, 6.38 për qind është norma e interesit në kredi, e 2.74 për qind norma e interesit në depozita. 81.6 për qind konsiderohet të jetë raporti kredi-depozita. Sipas raportit, kapitali u bankave komerciale për këtë muaj ishte 879.6 milionë euro. Vlera e kredive të reja në muajin janar 2024 ishte 137.9 milionë euro, derisa shuma e depozitave të reja arriti në 90.4 milionë euro. Po ashtu, norma mesatare e interesit në depozita ishte 2.74%, ndërsa norma mesatare e interesit në kredi ishte 6.38%”.

Për sa i përket aseteve të kompanive të sigurimit, BQK-ja tregon se deri në këtë muaj vlera e tyre ishte 312.2 milionë eurove dhe është rritje prej rreth 6.8 milionë euro krahasuar me muajin paraprak.

Ndërsa, asetet e fondeve pensionale kanë arritur vlerën e 2.75 miliardë euro, duke shënuar rritje për 41 milionë euro.

Në fund, BQK-ja tregon se asetet e ndërmjetësve tjerë financiar në fund të janarit 2024 janë zvogëluar për 1.7 milionë euro, krahasuar me muajin paraprak duke arritur vlerën e 511.9 milionë eurove.

7.36 miliardë euro, vlera e aseteve bankare
6.38% – norma e interesit në kredi, 2.74% – norma e interesit në depozita
137.9 milionë euro – vlera kredive të reja, 90.4 milionë euro – vlera e depozitave të reja
81.6%, raporti kredi-depozita
84.6 milionë euro, vlera e dërgesave nga mërgata
312.2 milionë euro, asetet e kompanive të sigurimit
2.75 miliardë euro, asetet e fondeve pensionale
511.9 milionë euro, asetet e ndërmjetësuesve të tjerë financiar./MONITOR