Një delegacion i lartë kinez viziton Korenë e Veriut për bisedime

Zyrtari i katërt më i lartë i Kinës, Wang Huning, ka zhvilluar bisedime në Phenian me një zyrtar të lartë të Partisë së Punëtorëve në pushtet të Koresë së Veriut.

Delegacioni kinez thuhet se mbërriti të mërkurën dhe u takua me Jo Yong Won, një zyrtar të lartë në Partinë e Punëtorëve.

Wang pohoi “vullnetin e partisë kineze dhe qeverisë” për të zbatuar marrëveshjen e arritur midis Xi dhe udhëheqësit të Koresë së Veriut Kim Jong Un gjatë vizitës së Xi në Phenian muajin e kaluar, raportoi KCNA të enjten, sipas Reuters.

Gjatë samitit të muajit të kaluar midis Xi dhe Kim, të dy udhëheqësit miratuan atë që media shtetërore e Koresë së Veriut e përshkroi si një “plan të gjerë” për forcimin e “marrëdhënieve më të fuqishme dhe strategjike”. Xi nxiti për një bashkëpunim më të ngushtë diplomatik, të zbatimit të ligjit dhe ushtarak me Korenë e Veriut gjatë vizitës, sipas medias shtetërore kineze.

Megjithëse vitet e fundit Pheniani është afruar jashtëzakonisht shumë me Moskën – përfshirë nënshkrimin e një marrëveshjeje strategjike mbrojtjeje që çoi në dislokimin e mijëra trupave të Koresë së Veriut për të luftuar në luftën e Rusisë në Ukrainë – Kina mbetet partneri më i madh ekonomik i Koresë së Veriut.

Në takimin e kësaj jave, Wang foli gjithashtu për 65-vjetorin e marrëdhënieve të miqësisë mes dy vendeve, ndërsa Jo i tha Wang-ut se Koreja e Veriut synon të zhvillojë komunikim strategjik dhe bashkëpunim taktik me Pekinin.

Dy zyrtarët diskutuan mënyrat për të përmirësuar mirëqenien publike dhe për të thelluar bashkëpunimin e ndërsjellë në biznes e kulturë, si dhe midis partive në pushtet të të dyja vendeve, shtoi KCNA, pa dhënë detaje të mëtejshme.

Yang Moo-jin, profesor në Universitetin e Studimeve për Korenë e Veriut në Seul, thotë se seria e takimeve të nivelit të lartë pasqyron një dëshirë të përbashkët për të forcuar lidhjet.