Irani dënoi të shtunën sulmet amerikane në disa vende përgjatë vijës bregdetare jugore, duke akuzuar Uashingtonin për shkelje të Kartës së OKB-së dhe paktit të nënshkruar së fundmi për t'i dhënë fund luftës.

Në një deklaratë, Ministria e Jashtme iraniane tha se sulmet kishin në shënjestër objektet e mbikëqyrjes bregdetare dhe riafirmuan të drejtën e Iranit për vetëmbrojtje, duke deklaruar se forcat e saj të armatosura kishin kryer sulme hakmarrëse ndaj objektivave të lidhura me SHBA-në.

Ministria gjithashtu u bëri thirrje shteteve të Gjirit "të parandalojnë çdo palë agresore nga përdorimi i territorit, dhe i objekteve të tyre për të kryer akte agresioni" kundër Teheranit.

Gjithashtu, ajo i bëri thirrje OKB-së dhe organeve ndërkombëtare, "të mos qëndrojnë indiferentë ndaj shkeljes flagrante" të së drejtës ndërkombëtare.

SHBA-të thanë të premten vonë se forcat e tyre goditën bazat iraniane të raketave, dronëve dhe radarëve, pasi akuzuan Teheranin se qëndron pas një sulmi ndaj një anijeje tregtare që kalonte Ngushticën e Hormuzit.

Më vonë, në përgjigje, Korpusi i Gardës Revolucionare Islamike (IRGC) e Iranit tha se forcat e saj detare shënjestruan pozicionet ushtarake amerikane në të gjithë rajonin, dhe u zotuan për një përgjigje të ashpër nëse përshkallëzimi vazhdon.

Më herët këtë muaj, Teherani dhe Uashingtoni arritën një memorandum mirëkuptimi prej 14 pikash të ndërmjetësuar nga Pakistani, i cili hyri në fuqi më 18 qershor pasi u nënshkrua elektronikisht nga presidenti iranian Masoud Pezeshkian dhe presidenti i SHBA-së Donald Trump.

Marrëveshja përfshin dispozita për përfundimin e armiqësive në fronte të shumta, përfshirë Libanin, rihapjen e Ngushticës së Hormuzit dhe heqjen e bllokadës detare amerikane ndaj Iranit, ndërsa 60 ditë bisedime vazhdojnë drejt një marrëveshjeje më gjithëpërfshirëse dhe të qëndrueshme./ AA.