BE lehtëson rregullat e reja të votimit për qytetarët jashtë vendit

Shtetet anëtare të BE-së kanë miratuar rregulla të reja, për ta bërë më të lehtë për qytetarët e bllokut që jetojnë në një shtet tjetër anëtar, të marrin pjesë në zgjedhjet lokale. 

Rregulloret e reja janë hartuar për të përmirësuar aksesin në informacion, në lidhje me të drejtat e votimit dhe procedurat e regjistrimit, sipas një deklarate të lëshuar të martën.

Sipas rregullave të reja, qytetarët duhet të informohen në mënyrë aktive në lidhje me të drejtat e tyre të votimit dhe kërkesat e regjistrimit në të ardhmen, duke përfshirë edhe në gjuhë të ndryshme që fliten në të gjithë bllokun. 

Për më tepër, ata që regjistrohen si votues në një vend tjetër të BE-së nuk do të hiqen më automatikisht nga regjistri zgjedhor në vendin e tyre të origjinës, thuhet në deklaratë.

Sipas qeverive të BE-së, duke cituar zyrën statistikore Eurostat, numri i qytetarëve të lëvizshëm brenda bllokut arriti në 14 milionë në fillim të vitit 2024.

Qytetarët e BE-së kanë të drejtë të marrin pjesë në zgjedhjet lokale në shtetin anëtar ku banojnë, sipas të njëjtave kushte si shtetasit e atij vendi, si në aspektin e votimit ashtu edhe të kandidimit për poste.

Rregullat e reja do të hyjnë në fuqi 20 ditë pas publikimit të tyre në Gazetën Zyrtare të BE-së.

Kryeqytetet e BE-së do të kenë më pas dy vjet për të përfshirë kërkesat në ligjin kombëtar. Vitin e kaluar, blloku miratoi rregulla për ta bërë më të lehtë votimin në zgjedhjet e Parlamentit Europian.

“Liria e lëvizjes duhet të shkojë krah për krah me aftësinë e plotë dhe të barabartë për të marrë pjesë në jetën demokratike”, tha Marilena Raouna, zëvendësministre për çështjet evropiane./ DPA News.