Kryeministri izraelit Benjamin Netanyahu shkroi sot në rrjetet sociale se Irani nuk do të ketë kurrë armë bërthamore, pas bisedimeve me presidentin e SHBA-së, Donald Trump.

Netanyahu postoi një imazh të gjeneruar nga inteligjenca artificiale në rrjetin social X, në të cilin vendosi mesazhin pranë presidentit amerikan se "Irani nuk do të zotërojë kurrë armë bërthamore".

Të dy folën të shtunën në mbrëmje, ndërsa Shtetet e Bashkuara dhe Irani kërkojnë të finalizojnë një marrëveshje për t'i dhënë fund përgjithmonë luftës. Gjatë bisedës telefonike, presidenti amerikan "e bëri të qartë se do të mbetet i vendosur në negociatat mbi kërkesën e tij të kahershme për të hequr programin bërthamor të Iranit dhe uraniumin e pasuruar nga territori iranian dhe se nuk do të nënshkruajë asnjë marrëveshje përfundimtare pa këto kushte", tha një zyrtar izraelit i paidentifikuar, raportuan mediat franceze.

“Gjatë bisedës me Trump, Netanyahu konfirmoi se vendi i tij do të ruajë lirinë e veprimit përballë kërcënimeve në të gjitha frontet, përfshirë Libanin, dhe Presidenti Trump riafirmoi mbështetjen e tij për këtë parim”, shtoi zyrtari.

Kryeministri izraelit "përsëriti mirënjohjen e tij ndaj Presidentit Trump për angazhimin e tij të gjatë dhe të jashtëzakonshëm ndaj sigurisë së Izraelit", tha një zyrtar izraelit.

Ditët e fundit, media amerikane ka raportuar për strategji të ndryshme midis Trump dhe Netanyahut në lidhje me zgjidhjen e konfliktit në Lindjen e Mesme, ku i pari mbështet një zgjidhje diplomatike, ndërsa kryeministri izraelit është në favor të ripërtëritjes së armiqësive.