Autoritetet në Danimarkë u kanë bërë thirrje qytetarëve që të mbajnë para cash në shtëpi si masë sigurie për raste emergjente, mes frikës në rritje për sulme kibernetike dhe dështime të sistemeve dixhitale të pagesave.

Banka Kombëtare Daneze ka rekomanduar që çdo qytetar të ketë të paktën 35 euro rezervë cash, në mënyrë që të mund të përballojë situata të papritura kur kartat bankare apo pagesat elektronike dalin jashtë funksionit.

“Jetojmë në një kohë kur popullsia duhet të jetë e përgatitur për dështime të mundshme të sistemeve kritike”, deklaruan autoritetet daneze, duke theksuar se varësia totale nga teknologjia mund të sjellë probleme serioze në kohë krizash.

Përveç mbajtjes së parave cash, qytetarëve u është rekomanduar të kenë më shumë se një kartë pagese dhe alternativa të tjera për kryerjen e pagesave në raste emergjente.

Alarmi është shtuar pas disa incidenteve teknologjike dhe ndërprerjeve të energjisë në vende të ndryshme europiane, ku për orë të tëra qytetarët nuk kanë mundur të përdorin kartat bankare apo shërbimet elektronike.

Sipas autoriteteve daneze, kërcënimet hibride dhe sulmet kibernetike ndaj infrastrukturës kritike janë bërë gjithnjë e më serioze, ndërsa objektiva potenciale mund të jenë bankat, rrjetet energjetike, ujësjellësit dhe sistemet dixhitale.

Edhe bizneset janë këshilluar të hartojnë plane emergjence për situata kur interneti ose sistemet elektronike të pagesave bllokohen, në mënyrë që aktiviteti ekonomik të mos paralizohet.

Autoritetet theksojnë se në një botë gjithnjë e më të varur nga teknologjia, mbajtja e një sasie parash cash nuk është më një praktikë e vjetëruar, por një masë sigurie për situata krize.