Turqia arreston 13 persona pasi gjykata shkarkoi kreun e partisë opozitare

Autoritetet turke kanë arrestuar 13 persona pas shkarkimit të udhëheqësit të opozitës Özgür Özel, me një urdhër nga një gjykatë e dominuar nga partia në pushtet e presidentit turk Rexhep Tajip Erdogan.

Agjencia e lajmeve Anadolu raportoi arrestimet të shtunën, duke cituar zyrën e prokurorit publik të Stambollit. Ajo tha se midis të ndaluarve ishin edhe delegatë të CHP-së së Özel-it, partisë më të madhe opozitare në Turqi. 

Ata akuzohen për ryshfet, pastrim parash dhe akuza të tjera në lidhje me një kongres të partisë CHP tre vjet më parë.

Një gjykatë në Ankara të enjten shpalli të pavlefshëm kongresin e partisë të vitit 2023 në të cilin Özel ishte zgjedhur kryetar i CHP-së, duke përmendur parregullsi të dyshuara, dhe e shkarkoi atë nga detyra. Gjykata emëroi ish-kryetarin e partisë Kemal Kılıçdaroğlu për ta zëvendësuar atë.

Kılıçdaroğlu, 77-vjeçar, i cili është shumë kontrovers, e udhëhoqi CHP-në për më shumë se 10 vjet. Ai humbi ndaj Erdoganit në zgjedhjet tre vjet më parë dhe më pas ndaj Özelit në luftën për udhëheqjen e partisë.

Vendimi shihet si një goditje e rëndë për kundërshtarët politikë të Erdoganit. Vëzhguesit e shohin vendimin si të motivuar politikisht, megjithëse qeveria ka pohuar se gjyqësori është i pavarur.

CHP paraqiti një ankesë kundër vendimit të së enjtes në Gjykatën e Lartë. Sipas ekspertëve, gjykatës mund t'i duhet më shumë se një vit për të marrë një vendim përfundimtar./ DPA News.