BE ul parashikimet e rritjes ekonomike ndërsa lufta në Lindjen e Mesme vazhdon

Komisioni Evropian uli të enjten vlerësimet e rritjes ekonomike në 1.1 përqind, ndërsa rritja e çmimeve të energjisë e nxitur nga lufta në Lindjen e Mesme shkakton një ngadalësim.

Në parashikimet e saj të fundit ekonomike, ekzekutivi i BE-së tha se konflikti do të rezultojë në inflacion dhe borxh publik më të lartë në të gjithë bllokun, pasi uli rritjen e pritur për ekonominë e BE-së nga 1.4 në 1.1 përqind këtë vit.

Por gjërat mund të përkeqësohen edhe më shumë. Vlerësimet e rritjes ekonomike mund të përgjysmohen nëse konflikti vazhdon më gjatë se sa pritej, u tha gazetarëve të enjten komisioneri i ekonomisë i BE-së, Valdis Dombrovskis.

Rritja e çmimeve të energjisë pritet gjithashtu ta çojë inflacionin në 3.1 përqind, një pikë përqindjeje më e lartë se parashikimi i vjeshtës.

Efektet e shokut energjetik do të shtrihen deri në vitin 2027, me një rritje të vlerësuar në 1.4 përqind vitin e ardhshëm.

“Kjo konfirmon implikimet negative të luftës në Lindjen e Mesme në ekonomi që kanë çuar në një ngadalësim ekonomik”, tha Dombrovskis.

Tre ekonomitë më të mëdha të BE-së - Gjermania, Franca dhe Italia - pritet të rriten me 0.6 për qind, 0.8 për qind dhe 0.5 për qind përkatësisht këtë vit, dukshëm nën mesataren e BE-së.

Kjo pengesë vjen pas viteve të rritjes së dobët dhe tronditjeve të vazhdueshme ekonomike në Evropë, nga lufta ruse në Ukrainë deri te tensionet tregtare me SHBA-në.

Ekonomitë evropiane po përballen tani me efektet e mbylljes së Ngushticës së Hormuzit, e cila ka shkaktuar një rritje të çmimeve të energjisë për bizneset dhe familjet.

Ashpërsia e tronditjes energjetike do të varet nga koha kur do të rihapet Ngushtica e Hormuzit — e cila kanalizon 20 përqind të trafikut global të naftës. Bisedimet midis SHBA-së dhe Iranit për t'i dhënë fund konfliktit në Lindjen e Mesme kanë ngecur.

Komisioni ka përdorur pritjet aktuale të tregut për çmimet e naftës, si skenar bazë për të bërë parashikimet e tij. Por Dombrovskis tha se një mbyllje më e gjatë se sa pritej e Ngushticës së Hormuzit, mund të përgjysmojë parashikimet e rritjes së BE-së për këtë vit dhe vitin e ardhshëm.

Pavarësisht bisedimeve të paqes, efektet ekonomike të konfliktit do të vazhdojnë në vitet në vijim. Deficitet mesatare qeveritare në Evropë pritet të rriten nga 3.1 përqind e PBB-së në vitin 2025 në 3.6 përqind në vitin 2027.

Deficiti i Gjermanisë, i cili parashikohet të jetë 3.7 përqind në vitin 2026, pritet të tejkalojë ndjeshëm pragun prej tre përqind të Komisionit. Kjo mund të rezultojë në hyrjen e Berlinit në regjimin special të BE-së për ata që shpenzojnë tepër, i njohur si procedura e deficitit të tepërt.

Parashikimet e fundit vijnë pas lajmeve të këqija nga një anketë në të gjithë eurozonën këtë mëngjes, e cila zbuloi se aktiviteti i sektorit privat u tkurr në maj me ritmin më të shpejtë në më shumë se dy vjet e gjysmë.

Pamja ishte veçanërisht e zymtë në Francë, ku aktiviteti i biznesit u tkurr me ritmin më të shpejtë në më shumë se pesë vjet, duke shënuar muajin e pestë radhazi të tkurrjes dhe duke sfiduar pritjet për një përmirësim të lehtë./ Politico.