Rusia nis sulme të reja në Odessa dhe Dnipro

Të paktën 20 persona u plagosën në sulmet me dronë dhe raketa ruse në Ukrainën qendrore dhe jugore, njoftuan autoritetet herët të hënën, pasi Moska u vu nën një nga sulmet më të rënda me dronë ukrainas të luftës.

Në qytetin portual të Odesës në Detin e Zi, dronët goditën një ndërtesë banimi, duke plagosur një djalë 11-vjeçar dhe një burrë 59-vjeçar, thanë zyrtarët. Në qytetin e Dnipros, të paktën 18 persona u plagosën, përfshirë dy fëmijë, sipas autoriteteve.

Informacioni nuk mund të verifikohej në mënyrë të pavarur.

Zyrtarët rusë thanë të dielën se Ukraina kishte nisur një nga sulmet e saj më të rënda në rajonin e Moskës gjatë natës, që nga fillimi i pushtimit në shkallë të plotë të Rusisë më shumë se katër vjet më parë. Të paktën tre persona u vranë, thanë ata.

Raportet ruse nuk mund të verifikohen në mënyrë të pavarur.

Numri i civilëve të vrarë dhe të plagosur dhe shkalla e dëmit në anën ruse, nuk janë të krahasueshme me humbjet dhe shkatërrimin shumë më të madh të shkaktuar në Ukrainë nga lufta shkatërruese e Moskës.

Kopshti dhe depoja e piroteknikës janë dëmtuar

Në Odessa, dronët dëmtuan gjithashtu një sallë leksionesh arsimore dhe një çerdhe, shkroi në Telegram Serhiy Lysak, kreu i administratës ushtarake lokale.

Në qytetin industrial juglindor të Dnipros, çatia e një ndërtese të lartë 24-katëshe u përfshi nga zjarri gjatë sulmit, tha guvernatori i Dnipropetrovskut, Oleksandr Hanzha, në Telegram.

Një depo që ruante piroteknikë u godit gjithashtu dhe u përfshi nga flakët, tha ai. Zjarre të tjera u raportuan në të gjithë qytetin. Shkalla e plotë e dëmit fillimisht ishte e paqartë.

Dnipro dhe Odessa janë shënjestruar vazhdimisht nga Rusia me raketa dhe dronë të llojeve të ndryshme./ DPA News.