Varianti  Andes i hantavirusit zakonisht përhapet përmes brejtësve, por edhe transmetimi nga njeriu te njeriu, si në epideminë në bordin e anijes MV Hondius, nuk është i pamundur.

Tre persona të infektuar vdiqën në anijen turistike që u nis nga Ushuaia, në provincën jugore argjentinase Tierra del Fuego, më 1 prill.

Argjentina ka regjistruar transmetim nga njeriu te njeriu edhe më parë, gjatë një epidemie në vitin 1996, i cili u konfirmua përsëri në një tjetër epidemi në vitin 2018.

AFP shpjegon çfarë dinë deri tani shkencëtarët argjentinas për këtë sëmundje të rrallë respiratore dhe mënyrën si përhapet.

Roli i brejtësve

Hantavirusi zakonisht përhapet përmes urinës, feçeve dhe pështymës së brejtësve të infektuar, zakonisht në ambiente të mbyllura.

Miu me bisht të gjatë i njohur si Oligoryzomys longicaudatus bart variantin Andes në Patagoni.

Sipas biologut Raul Gonzalez Ittig nga agjencia shkencore Conicet, rastet në Argjentinë mund të lidhen me fenomenin El Niño.

Reshjet e shumta kanë nxitur rritjen e bimësisë, gjë që mund të ketë shtuar popullsinë e brejtësve në vend.

Edhe pse një numër më i madh brejtësish nuk çon domosdoshmërisht në epidemi, ai krijon më shumë mundësi kontakti, tha Gonzalez Ittig për AFP.

Nga ana tjetër, thatësira dhe zjarret “bëjnë që popullsitë e brejtësve të bien,” shtoi ai.

Në rastet e njohura të transmetimit nga njeriu te njeriu, i vetmi brejtës i përfshirë është ai që shkaktoi infeksionin e parë.

Në këto raste, njohuritë ekzistuese për faktorët mjedisorë që lidhen me transmetimin nga brejtësit “nuk zbatohen”, tha specialistja e sëmundjeve infektive Maria Ester Lazaro.

Pa mutacion

Transmetimi nga njeriu te njeriu i variantit Andes “nuk është rregull, por një ngjarje e rrallë,” sipas epidemiologut Rodrigo Bustamante.

Ai kërkon kontakt të afërt, më pak se një metër për rreth 30 minuta, duke shtuar se hantavirusi është “shumë më pak i transmetueshëm” se COVID-19 apo gripi.

Bustamante theksoi se infeksionet ndodhin më shpesh mes anëtarëve të së njëjtës familje.

Shkencëtarët kanë hedhur poshtë idenë se një mutacion i fundit e ka bërë virusin të transmetueshëm mes njerëzve.

“Çdo hantavirus ka evoluar që nga kohët e lashta së bashku me brejtësin pritës, pa pësuar mutacione të rëndësishme,” tha Lazaro.

Si përhapet virusi në “zinxhirë transmetimi me disa hallka”, dhe jo vetëm te një person, mbetet ende e panjohur, shtoi ajo.

Gonzalez Ittig beson se virusi gjithmonë ka pasur këtë aftësi, duke sugjeruar se njerëzit mund të kenë filluar të hyjnë në hapësira ku brejtësit tashmë e bartnin sëmundjen.

I vështirë për t’u studiuar

Për shkak se ka shumë pak raste të hantavirusit, “duhet një kohë shumë e gjatë për të pasur një numër minimalisht të mjaftueshëm për të nxjerrë përfundime,” sipas Lazaro.

Bustamante ka vërejtur të njëjtin problem, në spitalin ku ai punon në Bariloche ka vetëm dy deri në katër raste në vit.

Edhe shpejtësia me të cilën përkeqësohet gjendja e pacientëve e vështirëson studimin, sipas ekspertëve.

Në fillim, pacientët mund të duken mirë, por rreth ditës së katërt simptomat mund të përkeqësohen “brenda disa orësh,” tha Lazaro.

Kjo e bën të vështirë përcaktimin e lëvizjeve të pacientit apo organizimin e studimeve klinike, shtoi ajo.

Shkencëtarë nga Instituti kryesor epidemiologjik i Argjentinës, Malbran, do të udhëheqin një mision hetimor në Ushuaia javën e ardhshme për të përcaktuar nëse virusi është i pranishëm në zonë.

Gjatë sezonit aktual epidemiologjik, që zgjat nga qershori në qershor, Argjentina ka regjistruar 102 raste të hantavirusit, pothuajse dyfish krahasuar me 57 rastet e raportuara në të njëjtën periudhë një vit më parë. / Medical xpress – Syri.net