Dy javë pasi u ndalua nga marina izraelite, një flotilje ndërkombëtare me ndihma për Gazën është nisur përsëri nga Turqia, thanë të enjten organizatorët dhe agjencia shtetërore turke e lajmeve Anadolu.

Flotilja Globale Sumud u nis nga porti turk i Marmaris me më shumë se 50 anije që transportonin aktivistë nga 40 vende, shkruan organizatorët në X.latform.

Grupi ndërkombëtar synon të sfidojë bllokadën detare të Izraelit ndaj Rripit të Gazës, e cila është në fuqi që nga viti 2007 me mbështetjen egjiptiane, dhe të ofrojë ndihmë në enklavën e shkatërruar nga lufta.

Më 30 prill, Marina Izraelite kapi më shumë se 20 anije flotilje në ujërat ndërkombëtare pranë Kretës dhe arrestoi 175 persona, sipas shifrave izraelite. Shumica e të ndaluarve u transferuan në Greqi dhe u riatdhesuan, ndërsa dy aktivistë të çuar në Izrael u deportuan pas më shumë se një jave.

Lëvizja më vonë u riorganizua në Turqi.

Disa shtete të Bashkimit Evropian, përfshirë Gjermaninë, vunë në pikëpyetje nëse përgjimi në ujërat ndërkombëtare ishte në përputhje me ligjin ndërkombëtar. Izraeli e ka mbrojtur operacionin si të ligjshëm dhe ka akuzuar disa aktivistë për lidhje me grupin militant islamik Hamas në Gaza.

Aktivistët janë të vetëdijshëm për rreziqet e përgjimit, por janë të përkushtuar të riorganizohen dhe të nisen për lundrim "përsëri, derisa të hiqet bllokada e paligjshme", tha Mustafa Özbek i grupit turk të të drejtave të njeriut IHH, i cili mbështet organizatën e flotiljes.

Turqia mund të jetë përsëri një qendër për rigrupimin e aktivistëve, tha Özbek për DPA-në.