Mikpritja madhështore e Kinës për Trump, mesazh force për botën

Presidenti amerikan Donald Trump, i cili ndërtoi profilin e tij politik me tone të ashpra ndaj Kinës, u shfaq krejt ndryshe gjatë vizitës së tij në Pekin, ku vlerësoi publikisht liderin kinez Xi Jinping dhe u duk i impresionuar nga ceremonia madhështore e organizuar për nder të tij.

“Ju jeni një lider i madh. Ua them të gjithëve këtë”, deklaroi Trump gjatë takimit me Xi Jinping, në atë që mediat e huaja e përshkruajnë si një koment spontan.

Presidenti amerikan u mahnit nga saktësia e gardës ushtarake të nderit gjatë ceremonisë zyrtare të pritjes jashtë Sallës së Madhe të Popullit në Pekin. Ai shijoi gjithashtu entuziazmin e fëmijëve kinezë që valëvitnin flamuj dhe brohorisnin për të, duke ndaluar dy herë për t’i përshëndetur.

Gjatë turit në Tempullin e Qiellit, Trump komentoi se Kina ishte “e bukur”, ndërsa pamjet e vizitës u transmetuan gjerësisht nga mediat ndërkombëtare.

Sipas analistëve, spektakli diplomatik i organizuar nga Pekini nuk ishte thjesht një përpjekje për të kënaqur presidentin amerikan, por një demonstrim i fuqisë dhe ndikimit të Kinës në arenën ndërkombëtare.

Në diplomacinë kineze, çdo detaj i ceremonialit konsiderohet pjesë e një mesazhi politik. Koreografia e kujdesshme e pritjes, e projektuar për t’u transmetuar drejtpërdrejt në rrjetet televizive amerikane, synon të tregojë se Kina mbetet e hapur ndaj partnerëve dhe marrëveshjeve ndërkombëtare.

Xi Jinping ka organizuar muajt e fundit pritje të ngjashme edhe për liderë të tjerë botërorë, përfshirë aleatë tradicionalë të SHBA-së si Kanada, Mbretëria e Bashkuar dhe Gjermania, të gjithë të interesuar për forcimin e marrëdhënieve ekonomike me Pekinin.

Sipas vëzhguesve ndërkombëtarë, kjo pritje madhështore po ushqen gjithnjë e më shumë perceptimin se balanca globale e fuqisë po anon gradualisht në favor të Kinës./BBC