Kancelari Friedrich Merz aktualisht e konsideron të pamundur që SHBA-të të furnizojnë Gjermaninë me raketa Tomahawk me rreze të mesme veprimi, të premtuara nga presidenti i atëhershëm Joe Biden në vitin 2024. 

“Siç e shoh unë për momentin, objektivisht, vështirë se ka ndonjë mundësi që SHBA-të të furnizojnë sisteme armësh të këtij lloji”, tha Merz për transmetuesin publik ARD të dielën. 

"Nëse nuk gabohem, amerikanët nuk kanë mjaftueshëm për momentin", shtoi kancelari. Çështja ka qenë në diskutim për muaj të tërë, "deri më tani pa asnjë angazhim nga SHBA-ja", tha ai.

Në samitin e NATO-s dy vjet më parë, Biden i premtoi Gjermanisë se, për herë të parë që nga Lufta e Ftohtë, armë me rreze të mesme veprimi me koka luftarake konvencionale do të stacionoheshin në Gjermani si një mjet parandalues, të aftë të arrinin deri në Rusi. 

Ai mbajti në dukje mundësinë e vendosjes së raketave lundruese Tomahawk me një rreze veprimi deri në 2,500 kilometra, raketave SM-6 dhe armëve hipersonike të zhvilluara rishtazi deri në vitin 2026. Presidenti Donald Trump deri më tani as nuk e ka mbështetur publikisht vendimin e Bidenit në atë kohë dhe as nuk e ka tërhequr atë.

Megjithatë, sipas mediave amerikane, Departamenti Amerikan i Luftës ka tërhequr planet për të vendosur një njësi për të operuar e mirëmbajtur raketat me rreze të mesme veprimi, si pjesë e reduktimit të planifikuar të trupave amerikane në Gjermani me 5,000.

Merz nuk u duk i befasuar nga vendimi i qeverisë amerikane për të zvogëluar numrin e trupave. “Ajo që kemi dëgjuar gjatë ditëve të fundit nuk është pikërisht diçka e re. Mund të jetë duke u ekzagjeruar pak, por nuk është asgjë e re”, pohoi ai.

Megjithatë, pas takimit të tij me Trump në Shtëpinë e Bardhë në mars, kancelari kishte tingëlluar krejt ndryshe. Trump e kishte “siguruar atë edhe një herë se SHBA-të do të ruanin praninë e tyre ushtarake në Gjermani”, tha ai në atë kohë. “Ky është një lajm i mirë, por nuk do të prisja asgjë tjetër.”

Merz pranoi se Bundeswehr aktualisht nuk është në gjendje të mbushë boshllëkun e lënë nga tërheqja e forcave amerikane./ DPA News.