Arrestime të anëtarëve të një sekti fetar në Mbretërinë e Bashkuar: Krime të rënda seksuale, martesa të detyruara dhe skllavëri moderne

Gjashtë persona janë arrestuar me akuza të rënda, përfshirë skllavërinë moderne, në një grup fetar në Cheshire të Mbretërisë së Bashkuar, tha policia.

Më shumë se 500 oficerë policie morën pjesë në bastisje në tre lokacione si pjesë e një hetimi ndaj një grupi me bazë në Crewe të quajtur Feja Ahmadi e Paqes dhe Dritës (ARPOL), e cila u themelua nga ndjekësit e Islamit Shiit në fillim të këtij shekulli, sipas BBC-së.

Policia e Cheshire tha se u njoftua muajin e kaluar për akuzat për krime të rënda seksuale, martesë të detyruar dhe skllavëri moderne, të cilat thuhet se kanë ndodhur në vitin 2023.

Grupi aktualisht ka rreth 150 anëtarë dhe akuzat lidhen me një grua që ishte anëtare në kohën kur ndodhën krimet e dyshuara.

Midis të arrestuarve ishin katër burra dhe dy gra të kombësive të ndryshme, përfshirë amerikanë, meksikanë, italianë, spanjollë dhe britanikë.

Bastisjet u kryen rreth orës 8:50 të mëngjesit sipas orës lokale të së martës, dhe një numër automjetesh policie dhe emergjence u panë jashtë Fushës Sportive King George V.

Mbyllje rrugësh u raportuan gjithashtu në zonën e Victoria Avenue, pranë Queens Park.Detektivët kontrolluan tre prona, përfshirë Webb House, dhe policia tha se po punonin me autoritetet lokale për të mbështetur banorët dhe për të vendosur masa mbrojtëse të përshtatshme.

Një përfaqësues i këshillit vendor konfirmoi përfshirjen e tyre: "Prioriteti ynë është të sigurohemi që njerëzit që janë zhvendosur janë të sigurt dhe për të cilët kujdesen."

"Operacioni i sotëm është rezultat i një hetimi të detajuar dhe tërësor", tha Kryeinspektori Gareth Wrigley.

"Edhe pse anëtarët e këtij grupi janë arrestuar, dua ta bëj të qartë se ky nuk është një hetim kundër fesë, por kundër akuzave serioze që na janë raportuar."

ARPOL u themelua në fillim të këtij shekulli dhe mbështetet në traditën shiite, por komunitetet kryesore myslimane janë distancuar prej tij prej kohësh.

Kjo organizatë nuk duhet ngatërruar me Komunitetin Musliman Ahmedia, i cili rrjedh nga Islami Sunit, u themelua në Pakistan dhe ka një prani të konsiderueshme në Mbretërinë e Bashkuar.

Deputeti i Partisë Laburiste për Crewe dhe Nantwich, Conor Naismith, tha se e kuptonte që bastisjet i kishin mërzitur banorët vendas.

"Kam kërkuar që policia të kryejë një hetim të plotë dhe të shpejtë në mënyrë që drejtësia të vihet në vend dhe situata në komunitet të qetësohet", shtoi ai.

Policia theksoi se i merr seriozisht të gjitha raportimet për dhunë seksuale dhe do të bëjë gjithçka për të vënë drejtësi në vend.

U shtua se nuk ka rrezik për komunitetin e gjerë dhe se prania e policisë është rritur për një ndjenjë shtesë sigurie.

"I bëj thirrje kujtdo që ka ndonjë informacion të kontaktojë policinë," tha Wrigley.

Ai shtoi se do të vazhdojë të ketë një "prani të konsiderueshme policore" në zonë, si për hetimin ashtu edhe për të siguruar qytetarët.