Politikanët në Indi bëjnë fushatë me peshq në duar, çfarë po ndodh?

Në një mëngjes të nxehtë në qytetin lindor indian Kolkata, kandidati për deputet Koustav Bagchi shkon derë më derë i veshur me rroba tradicionale bardhekuqe, duke mbajtur në dorë një peshk.

Pas tij dëgjohen daulle dhe mbështetës që thërrasin emrin e tij. Ish-avokat dhe tashmë kandidat i Bharatiya Janata Party (BJP) për zonën e Barrackpore në zgjedhjet e ardhshme në shtetin e Bengalit Perëndimor, Bagchi po përdor peshkun si simbol për të fituar vota—pa pasur nevojë për fjalime politike.

Mesazhi është i thjeshtë: “Jam njëri prej jush”.

Pak kilometra më tej, një tjetër kandidat i BJP-së, Rakesh Singh, po ndjek të njëjtën strategji. Ai shfaqet në publik duke ngritur peshkun para turmës, ndërsa sfidon kryetarin aktual të bashkisë, Firhad Hakim, në një nga garat më të rëndësishme në shtet.

Peshku si armë politike

Në Bengalin Perëndimor, peshku nuk është thjesht ushqim ai është pjesë thelbësore e kulturës, identitetit dhe jetës së përditshme. Për këtë arsye, ai është kthyer në një simbol të fuqishëm elektoral.

Në këtë fushatë, kandidatët po e përdorin peshkun si një formë “teatri politik” për të qetësuar një shqetësim specifik të votuesve.

Në Indi, zakonet ushqimore janë shpesh çështje politike. Partia në pushtet, e udhëhequr nga kryeministri Narendra Modi, shpesh perceptohet si promovuese e një stili jetese më shumë vegjetarian. Kufizimet e herëpashershme ndaj mishit në disa shtete dhe politikat për mbrojtjen e lopëve e kanë forcuar këtë perceptim.

Akuza dhe kundërakuza

Kryeministrja e Bengalit Perëndimor, Mamata Banerjee, e cila kërkon një mandat të katërt, ka akuzuar BJP-në se “kërcënon mënyrën e jetesës” së rajonit.

“Bengali jeton me peshk dhe oriz. Si mund t’u thuash njerëzve të mos hanë peshk, mish apo vezë?” deklaroi ajo gjatë një mitingu.

Nga ana tjetër, përfaqësues të BJP-së, si Smriti Irani, i kanë quajtur këto akuza “gënjeshtra”, duke theksuar se peshku është pjesë e pandashme e kulturës së Bengalit.

Edhe vetë Modi e ka përdorur çështjen e peshkut në fushatë, por në një tjetër këndvështrim, duke akuzuar qeverinë lokale për dështim ekonomik, pasi sipas tij rajoni nuk prodhon mjaftueshëm peshk dhe detyrohet ta importojë.

Më shumë se ushqim

Sipas të dhënave, India është prodhuesi i tretë më i madh i peshkut në botë, ndërsa në Bengalin Perëndimor rreth 65.7% e popullsisë konsumon peshk çdo javë.

Por në këtë rajon, peshku ka një kuptim shumë më të thellë: ai lidhet me historinë, gjeografinë, klasën sociale dhe identitetin kulturor.

Pikërisht kjo e ka bërë atë një mjet të fuqishëm politik.

Një fushatë ndryshe

Në një fushatë ku ndërthuren identiteti kulturor, ekonomia dhe rivaliteti politik, peshku është kthyer në simbolin kryesor të betejës elektorale.

Edhe pse nuk pritet të vendosë rezultatin e zgjedhjeve, ai tashmë ka formësuar debatin politik—duke treguar se në Indi, politika dhe kultura shpesh ecin krah për krah.