BE e përsërit: S’ka mungesa karburanti për avionë, po i monitorojmë ato!

Bashkimi Evropian ka ripërsëritur edhe njëherë se Evropa nuk ka mungesa karburanti për avionë, për momentin.

Një zëdhënës i Komisionit Evropian e përsëriti këtë gjatë konferencës së përditshme për gazetarët.

Referuar situatës që po ndodh me Ngushticën e Hormuzit dhe bllokadës amerikane për  cisternat e naftës që kalon përgjatë rrugës ujore, BE njoftoi se grupi i Koordinimit të Naftës "do të takohet përsëri në fund të kësaj jave".

"Disponueshmëria e karburantit të aviacionit është padyshim një përparësi dhe është e rëndësishme të nënvizohet se, këtu në Bashkimin Evropian, ne gjithashtu kemi kapacitet të konsiderueshëm për rafinimin e naftës bruto dhe prodhimin e karburantit për avionë".

Zëdhënësi i Komisionit Evropian u shpreh gjithashtu se po bëhen përgatitje për veprime të mundshme.

"Megjithatë, gjithçka varet nga mënyra se si do të evoluojë situata. Aktualisht, nuk ka mungesa karburanti në BE.", raporton ANSA.