Sulmet izraelite vrasin katër palestinezë në Gaza

Një sulm ajror izraelit ka vrarë katër palestinezë në veri të Rripit të Gazës të dielën, njoftuan autoritetet lokale shëndetësore, në një tjetër episod dhune që po e errëson armëpushimin e brishtë, ndërsa ndërmjetësit po përpiqen të forcojnë marrëveshjen.

Mjekët thanë se sulmi ajror goditi një grup njerëzish në rrugën Jaffa, pranë lagjes Darraj në qytetin e Gazës, duke vrarë katër persona dhe duke plagosur të tjerë.

Ushtria izraelite nuk ka komentuar menjëherë mbi ngjarjen.

Grupi militant palestinez Hamas dhe Izraeli kanë shkëmbyer akuza për shkelje të armëpushimit të arritur në tetor të vitit të kaluar, i cili i dha fund dy viteve luftë të ashpër.

Ministria e Shëndetësisë në Gaza thotë se nga zjarri izraelit janë vrarë të paktën 700 njerëz që nga hyrja në fuqi e armëpushimit. Nga ana tjetër, Izraeli deklaron se katër ushtarë të tij janë vrarë nga militantët në Gaza gjatë së njëjtës periudhë.

Një delegacion i Hamasit është takuar javën e kaluar në Kajro me ndërmjetës egjiptianë, katariotë dhe turq për të dhënë përgjigjen fillestare ndaj një propozimi për çarmatim të paraqitur muajin e kaluar. Sipas burimeve, grupi ka deklaruar se nuk do të diskutojë dorëzimin e armëve pa garanci që Izraeli të tërhiqet plotësisht nga Gaza, siç parashikohet në planin e çarmatimit të propozuar nga presidenti amerikan Donald Trump përmes “Këshillit të Paqes”.

Çarmatimi i Hamasit mbetet një nga çështjet kryesore në bisedimet për zbatimin e planit dhe konsolidimin e armëpushimit.

Sipas të dhënave izraelite, sulmet e Hamasit më 7 tetor 2023 vranë 1,200 persona. Ndërkohë, fushata ushtarake dyvjeçare e Izraelit ka shkaktuar mbi 72,000 viktima palestineze, shumica civilë, sipas autoriteteve shëndetësore në Gaza, duke shkaktuar gjithashtu uri masive, shkatërrim të infrastrukturës dhe zhvendosje të shumta të popullsisë./Reuters