Ghalibaf: Armiku flet për negociata, por në fshehtësi planifikon sulm tokësor

Kryetari i Parlamentit iranian, Mohammad Bagher Ghalibaf, ka akuzuar kundërshtarët se po sinjalizojnë gatishmëri për negociata në publik, ndërsa në prapaskenë po përgatisin një sulm tokësor.

Deklarata është publikuar nga mediat iraniane, përfshirë agjencinë zyrtare IRNA, në kuadër të 30 ditëve nga nisja e luftës.

Sipas Ghalibaf, Shtetet e Bashkuara po paraqesin një listë me 15 kërkesa, duke synuar të arrijnë përmes presionit atë që, sipas tij, nuk e realizuan gjatë konfliktit.

Ai paralajmëroi se forcat iraniane janë në gatishmëri dhe “presin hyrjen e trupave amerikane në terren” për t’iu kundërpërgjigjur me forcë.

Në lidhje me mundësinë e dorëzimit, Ghalibaf theksoi se qëndrimi i Iranit është i qartë dhe se vendi nuk do të pranojë “asnjë formë poshtërimi”.

Ndërkohë, raportime të pakonfirmuara sugjerojnë se në të kaluarën administrata Trump e ka konsideruar Ghalibafin si një figurë të mundshme për bashkëpunim, madje edhe si një lider potencial në të ardhmen./BBC