Kina i ofroi Tajvanit stabilitet energjitik nëse ai pranonte bashkimin me Pekinin

Kina i ofroi sot Tajvanit atë që e quajti stabilitet energjetik nëse ai pranonte sundimin e Pekinit, si pjesë e fushatës së vendit për të bindur Tajvanin të "ribashkohet".

Tajvani nuk blen energji nga Kina dhe merr rreth një të tretën e gazit të lëngshëm nga Katari, dhe administrata e ishullit njoftoi se ka siguruar furnizues alternativë për periudhën e ardhshme, përfshirë disa nga Shtetet e Bashkuara të Amerikës (SHBA), raporton Reuters.

Chen Binhua, një zëdhënës i Zyrës së Çështjeve të Tajvanit në Kinë, u tha gazetarëve në Pekin se "ribashkimi paqësor" do të sillte mbrojtje më të mirë të sigurisë së energjisë dhe burimeve të Tajvanit, me një "atdhe të fortë" për ta mbështetur atë.

"Ne jemi të gatshëm t'u ofrojmë bashkatdhetarëve të Tajvanit siguri të qëndrueshme dhe të besueshme të energjisë dhe burimeve, në mënyrë që ata të mund të jetojnë më mirë", tha ai kur u pyet për furnizimin me energji të Tajvanit gjatë luftës në Lindjen e Mesme.

Presidenti i Tajvanit, Lai Ching-te, përsëriti sot se furnizimet me energji për këtë muaj dhe muajin tjetër janë të garantuara dhe se më shumë gaz amerikan do të importohet nga qershori.Tajvani ka miratuar një qasje strategjike të larmishme dhe me shumë burime ndaj importeve të energjisë”, tha Lai, sipas një deklarate nga partia e tij.

Kina i ka ofruar prej kohësh Tajvanit autonomi sipas parimit "një vend, dy sisteme" nëse ky i fundit pranon të vendoset nën kontrollin e Pekinit, të cilin asnjë nga partitë kryesore politike të Tajvanit nuk e mbështet.

Agjencia kineze e lajmeve Xinhua tha në tetor të vitit të kaluar se Tajvani do të gëzonte përfitime pas "ribashkimit", duke përfshirë mbështetjen ekonomike, por shtoi se ishulli duhet të qeveriset nga "patriotë".

Kina nuk ka hequr dorë kurrë nga përdorimi i forcës për të vënë Tajvanin nën kontrollin e saj.

Kina është importuesja më e madhe e naftës në botë dhe javën e kaluar ndaloi eksportet e karburantit të paktën deri në fund të marsit në një përpjekje për të parandaluar mungesat e brendshme, thanë burimet, duke kufizuar eksportet që arritën në 22 miliardë dollarë vitin e kaluar.

Qeveritë në mbarë botën po përpiqen të gjejnë burime alternative të energjisë për shkak të luftës në Lindjen e Mesme dhe ndërprerjes së rrugëve të transportit detar përmes Ngushticës së Hormuzit.