Ministrat e Jashtëm të Bashkimit Evropian po mbarojnë kohën për të miratuar unanimisht mbështetjen e mëtejshme për Ukrainën, përpara përvjetorit të katërt të pushtimit në shkallë të plotë nga Rusia, pasi Hungaria njoftoi se do të vërë veton ndaj masave.

"Jam i habitur nga qëndrimi i Hungarisë", tha Ministri i Jashtëm gjerman Johann Wadephul, ndërsa mbërriti në një takim të homologëve të tij të BE-së në Bruksel të hënën.

Ministrat pritej të nënshkruanin zyrtarisht një kredi të BE-së prej 90 miliardë eurosh (106 miliardë dollarë) dhe paketën e 20-të të sanksioneve të bllokut ndaj Rusisë, një ditë përpara se zyrtarët e lartë të BE-së të udhëtonin në Kiev, për të shënuar përvjetorin e pushtimit të Moskës më 24 shkurt 2022.

Por me bllokadën e Budapestit, Presidentja e Komisionit Evropian Ursula von der Leyen dhe Presidenti i Këshillit Evropian António Costa, mund të mbërrijnë në Kiev pa miratimin e mbështetjes së re.

«Nuk besoj se është e drejtë që Hungaria të tradhtojë luftën e saj për liri dhe sovranitet evropian», tha Wadephul, duke aluduar në sundimin dekadash të Bashkimit Sovjetik mbi Hungarinë pas Luftës së Dytë Botërore.

Ai do t'i kërkojë Hungarisë të rishqyrtojë qëndrimin e saj, tha ministri gjerman.

Kryeministri hungarez Viktor Orbán tha se Budapesti do të bllokojë të dyja masat, nëse nuk rifillon eksporti i naftës ruse në Hungari nëpërmjet tubacionit Druzhba.

"Mendoj se nuk duhet t'i lidhim së bashku gjërat, që nuk janë aspak të lidhura me njëra-tjetrën", tha kryediplomatja e BE-së, Kaja Kallas.

Kredia prej 90 miliardë eurosh u miratua fillimisht nga udhëheqësit e BE-së, përfshirë Orbán-in, në dhjetor dhe më pas u miratua nga Parlamenti Evropian, por ende duhet të miratohet zyrtarisht nga ministrat e BE-së.

Financimi synon të përmbushë nevojat financiare dhe ushtarake të Ukrainës deri në fund të vitit 2027, duke i mundësuar asaj t'i rezistojë më tej Moskës.

Ukraina thotë se rrjedha e naftës është ndërprerë nga bombardimet ruse që nga fundi i janarit. Hungaria dhe Sllovakia, të cilat gjithashtu vazhdojnë të marrin naftë ruse nëpërmjet tubacionit, akuzojnë udhëheqjen ukrainase për pengimin e qëllimshëm të rifillimit të dërgesave.

Paketa e 20-të e sanksioneve të BE-së do të përfshijë një ndalim të shërbimeve detare, që lidhen me eksportet e naftës bruto ruse.

Përveç kësaj, Komisioni Evropian ka propozuar gjithashtu kufizime shtesë financiare, për të kufizuar më tej aftësinë e Rusisë për të kryer pagesa ndërkombëtare për të financuar aktivitete ekonomike.

Wadephul shprehu besim se ngërçi mund të zgjidhet.

"Po punojmë intensivisht për paketën e 20-të të sanksioneve", tha Wadephul.

"Jam gjithashtu i sigurt se do të kemi sukses në fund të ditës", tha ai. "Të gjitha problemet që ekzistojnë mund të kapërcehen me qartësi, me vendosmëri nga ana e Ukrainës, me një orientim të qartë evropian."/ DPA News.