Qeveria franceze iu përgjigj shkurt Mark Rutte, pasi sekretari i përgjithshëm i NATO-s tha se Evropa nuk mund të mbrohej pa SHBA-në

"Jo, i dashur Mark Rutte. Evropianët mund dhe duhet të marrin përsipër sigurinë e tyre. Edhe Shtetet e Bashkuara janë dakord. Kjo është shtylla evropiane e NATO-s", tha Ministri i Jashtëm francez Jean-Noël Barrot.

Të hënën, duke iu përgjigjur një pyetjeje nga eurodeputeti francez i ekstremit të djathtë Pierre-Romain Thionnet, Rutte i tha Parlamentit Europian se kontinenti nuk mund të mbrohet pa mbështetjen amerikane.

Ai gjithashtu kundërshtoi idenë e një ushtrie europiane - një koncept i ringjallur së fundmi nga Komisioneri i Mbrojtjes i BE-së, Andrius Kubilius - dhe tha se një "shtyllë europiane [e NATO-s] është një fjalë paksa boshe".

Megjithatë, që kur Presidenti i SHBA-së Donald Trump u rikthye në pushtet, administrata e tij ka këmbëngulur që Uashingtoni të jetë më pak i përfshirë në sigurinë e Evropës.

Një Strategji e re Kombëtare e Mbrojtjes e SHBA-së, e publikuar të premten në mbrëmje, tha se evropianët do të duhet të marrin drejtimin kundër kërcënimeve, duke argumentuar se Evropa është ekonomikisht dhe ushtarakisht e aftë të mbrohet nga Rusia.

Vitin e kaluar, Trump arriti të bindë vendet evropiane që të rrisin shpenzimet e tyre të mbrojtjes në 5 përqind të PBB-së.

Barrot nuk ishte i vetmi në Francë, që kundërshtoi komentet e Rutte-s.

Muriel Domenach, ish-ambasadorja e Francës në NATO, postoi në X se "me gjithë respektin e duhur për Sekretarin e Përgjithshëm të NATO-s, kjo nuk është: pyetja e duhur... përgjigjja e duhur: shfaqja e dobësisë evropiane për të siguruar garancinë e SHBA-së, është një qasje e vjetëruar dhe i dërgon mesazhin e gabuar Rusisë".

Pa përmendur konkretisht Rutte-n, ministrja franceze e Forcave të Armatosura, Catherine Vautrin, i tha radios franceze se "ajo që shohim sot është domosdoshmëria e shtyllës evropiane të NATO-s".

Ideja e bërjes së evropianëve kolektivisht më të fortë brenda aleancës ushtarake, e propozuar për herë të parë nga Franca disa vjet më parë, tani mbështetet nga vende të tjera, përfshirë Gjermaninë.

Komentet e Rutte-s kundërshtuan gjithashtu vlerësimin e Presidentit finlandez Alexander Stubb, i cili tha në Davos javën e kaluar se evropianët mund të mbrojnë veten./ Politico.