Ish-presidenti amerikan Barack Obama ishte midis atyre që dënuan të shtënat e dyta fatale të një civili nga oficerët e imigracionit amerikan brenda dy javësh, duke u thënë qytetarëve të dielën se kishin të drejtë të ishin të indinjuar.

"Vrasja e Alex Pretti-t është një tragjedi zemërthyese. Duhet të jetë gjithashtu një thirrje zgjimi për çdo amerikan, pavarësisht nga partia, se shumë nga vlerat tona thelbësore si komb po sulmohen gjithnjë e më shumë", tha Obama në një postim në X, në përgjigje të të shtënave në qytetin amerikan të Minneapolis të shtunën.

The killing of Alex Pretti is a heartbreaking tragedy. It should also be a wake-up call to every American, regardless of party, that many of our core values as a nation are increasingly under assault. pic.twitter.com/0JmEsJ1QFW

— Barack Obama (@BarackObama) January 25, 2026

"Për javë të tëra, njerëzit në të gjithë vendin janë indinjuar me të drejtë nga spektakli i rekrutëve të maskuar të ICE-së dhe agjentëve të tjerë federalë që veprojnë pa u ndëshkuar dhe angazhohen në taktika që duket se janë të dizajnuara për të frikësuar, ngacmuar, provokuar dhe rrezikuar banorët e një qyteti të madh amerikan."

Obama u bëri thirrje amerikanëve të “mbështesin dhe të frymëzohen nga vala e protestave paqësore” në Minneapolis dhe pjesë të tjera të vendit.

"Ato janë një kujtesë në kohën e duhur se në fund të fundit, varet nga secili prej nesh si qytetarë të ngremë zërin kundër padrejtësisë, të mbrojmë liritë tona themelore dhe ta mbajmë qeverinë tonë përgjegjëse."

Ish-presidenti amerikan, Bill Clinton, u bëri jehonë fjalëve të Obamës.

"Në çdo hap, njerëzit përgjegjës na kanë gënjyer, na kanë thënë të mos e besojmë atë që kemi parë me sytë tanë dhe kanë nxitur taktika gjithnjë e më agresive dhe armiqësore, duke përfshirë pengimin e hetimeve nga autoritetet lokale", tha ai në një deklaratë.

"Gjatë gjithë jetës, përballemi vetëm me disa momente ku vendimet që marrim dhe veprimet që ndërmarrim, do të formësojnë historinë tonë për vitet që do të vijnë. Ky është një prej tyre. Nëse i heqim dorë nga liritë tona pas 250 vjetësh, mund të mos i marrim kurrë më ato."

Ishte detyrë e “të gjithë neve që besojmë në premtimin e demokracisë amerikane të ngriheshim, të flisnim hapur dhe të tregonim se kombi ynë ende i përket Neve, Popullit”, shtoi ai.

Over the course of a lifetime, we face only a few moments where the decisions we make and the actions we take will shape our history for years to come.  This is one of them. pic.twitter.com/fr4TclLBZd

— Bill Clinton (@BillClinton) January 25, 2026

Guvernatori i Kalifornisë, Gavin Newsom, më parë kërkoi shkarkimin e Sekretares së Departamentit të Sigurisë Kombëtare, Kristi Noem, dhe të shefit të Patrullës Kufitare, Greg Bovino.

"Kristi Noem duhet të JAPË DORËHEQJE. Greg Bovino duhet të SHKARKOHET", tha Newsom në X. "Pezulloni bastisjet masive të deportimit PA LIGJ në të gjithë vendin TANI — ICE nuk po deporton më vetëm kriminelë të rrezikshëm", pohoi Newsom.

Përveç kësaj, demokratët në Senatin e SHBA-së kërcënuan të bllokojnë fondet buxhetore për Departamentin e Sigurisë Kombëtare.

Pas vdekjes së Prettit, një infermier 37-vjeçar i bardhë që punonte në një spital veteranësh, në Minneapolis, shpërthyen protesta të reja kundër bastisjeve të deportimit dhe shtypjes së rezistencës paqësore ndaj tyre.

Vrasja vjen vetëm dy javë pasi 37-vjeçarja Renee Good u qëllua në makinën e saj nga agjentë federalë në të njëjtin qytet, duke shkaktuar demonstrata në të gjithë vendin, pasi videot dukeshin se kundërshtonin pretendimet e autoriteteve se agjentët ishin në rrezik vdekjeprurës gjatë incidentit.

Përveç kësaj, dhjetëra njerëz u mblodhën për një vigjilje me qirinj jashtë shtëpisë së burrit të vrarë.

Yjet e Hollivudit iu bashkuan korit në rritje të kritikave ndaj politikës së deportimit, nën administratën e Presidentit të SHBA-së, Donald Trump.

Aktorja Olivia Wilde i tha revistës Variety: "Jam e tmerruar dhe e neveritur. Nuk mund të kalojmë as edhe një ditë duke e pranuar këtë si normën tonë të re. Është skandaloze."

Ajo shtoi: “Njerëz po vriten dhe nuk dua ta normalizoj të shoh atë dhunë – në internet apo në film. Është e shëmtuar.”

Duke folur në Festivalin e Filmit Sundance në Idaho, aktorja Natalie Portman tha se SHBA-të ndodheshin "në një moment të historisë së vendit tonë që është mjaft shkatërrues".

"Është vërtet e pamundur të mos flasësh për atë që po ndodh tani dhe brutalitetin e ICE-së, dhe se si duhet të ndalet menjëherë", shtoi Portmann./ DPA News.