Ministria e Mbrojtjes e Kinës ka konfirmuar se ka hapur një hetim ndaj gjeneralit me gradën më të lartë të vendit, Zhang Youxia, për “shkelje të rënda të disiplinës dhe ligjit”, në një nga goditjet më të forta ndaj ushtrisë kineze në dekada.

Autoritetet nuk kanë dhënë detaje të mëtejshme mbi akuzat, por në Kinë ky formulim përdoret zakonisht si eufemizëm për korrupsion. Në të njëjtën kohë, ministria njoftoi se edhe një tjetër oficer i lartë, Gjenerali Liu Zhenli, është vënë nën hetim.

Zhang Youxia, 75 vjeç, është nënkryetar i Komisionit Qendror Ushtarak (CMC) – organi më i lartë që kontrollon forcat e armatosura dhe që drejtohet nga Presidenti Xi Jinping. Ai është gjithashtu anëtar i Byrosë Politike me 24 anëtarë, organi më i lartë vendimmarrës i Partisë Komuniste Kineze.

Gjenerali Zhang është parë gjerësisht si aleati më i afërt ushtarak i Xi Jinping, ndërsa fakti që ai u mbajt në detyrë përtej moshës së zakonshme të pensionit u interpretua si shenjë e besimit të plotë të presidentit ndaj tij. Ai është gjithashtu një nga të paktët drejtues të lartë ushtarakë kinezë me përvojë të drejtpërdrejtë luftarake.

Babai i tij ishte një nga gjeneralët themelues të Partisë Komuniste Kineze, ndërsa vetë Zhang iu bashkua ushtrisë në vitin 1968.

Hetimi vjen vetëm disa muaj pasi nëntë gjeneralë të lartë u përjashtuan nga detyra në tetor, në atë që konsiderohet një nga spastrimet më të mëdha publike të ushtrisë kineze në vitet e fundit. Ai pason gjithashtu thashetheme të forta që u përhapën në dhjetor, pasi Zhang dhe Liu munguan në një aktivitet të nivelit të lartë shtetëror.

Që nga ardhja në pushtet, Presidenti Xi Jinping ka ndërmarrë fushata të vazhdueshme kundër korrupsionit në të gjitha institucionet shtetërore, me një fokus gjithnjë e më të madh te ushtria. Xi e ka cilësuar korrupsionin si “kërcënimin më të madh” për Partinë Komuniste, duke paralajmëruar se lufta kundër tij “mbetet e rëndë dhe komplekse”.

Ndërsa mbështetësit e këtyre fushatave thonë se ato synojnë forcimin e disiplinës dhe qeverisjes së mirë, kritikët pretendojnë se ato përdoren edhe si mjet për eliminimin e rivalëve politikë dhe konsolidimin e pushtetit.

Pas hetimeve të fundit, Komisioni Qendror Ushtarak ka mbetur praktikisht me vetëm dy anëtarë aktivë nga shtatë fillestarë: Presidentin Xi Jinping, në cilësinë e kryetarit, dhe Zhang Shengmin, përgjegjës për çështjet disiplinore të ushtrisë.