Presidenti i Ukrainës Zelensky thotë se është arritur një marrëveshje me Presidentin e SHBA, Donald Trump për garancitë e sigurisë në rast të një armëpushimi me Rusinë, por ajo nuk është nënshkruar ende

Nga Paul Kirby, BBC

Për presidentin ukrainas Volodymyr Zelensky, sigurimi i mbështetjes së presidentit amerikan për garanci sigurie është një arritje e rëndësishme, por tani vëmendja do të përqendrohet te bisedimet trepalëshe mes Ukrainës, SHBA-së dhe Rusisë, që pritet të zhvillohen në Emiratet e Bashkuara Arabe.

I dërguari i Donald Trump, Steve Witkoff, thotë se do të udhëtojë drejt Abu Dhabit nga Moska, ndërsa Zelensky tashmë ka emëruar ekipin e tij për të marrë pjesë, i cili përfshin zyrtarët e tij më të lartë.

Witkoff shprehet optimist se çështja e vetme e madhe që i ndan dy palët është “e zgjidhshme” – dhe Zelensky ka konfirmuar se bëhet fjalë “tërësisht për territorin” në Ukrainën lindore.

A do të pranojë Putini planin amerikan për një zonë të çmilitarizuar dhe të tregtisë së lirë në Donbas, apo do të vazhdojë të kërkojë kontroll rus?

Ritmi i diplomacisë është përshpejtuar dukshëm, por këto garanci sigurie nga SHBA-ja nuk do të nënshkruhen së shpejti.

Zelensky thotë se ato fillimisht duhet të ratifikohen nga Kongresi amerikan dhe parlamenti ukrainas.

Dhe ende nuk dihet se çfarë do të përfshijnë ato – Kievi kishte kërkuar deri në 50 vjet angazhim të fortë amerikan për të ndihmuar Ukrainën në rast se sulmohet. Kjo ka qenë gjithmonë një pritshmëri optimiste.

Por Zelensky është i bindur se pa një “mbështetje garantuese” nga Trump, Koalicioni i të Gatshmëve, i udhëhequr nga Mbretëria e Bashkuar dhe Franca, nuk do të mjaftojë.