Presidenti i Serbisë, Aleksandar Vuçiç, deklaroi se Bordi i Paqes, i iniciuar të enjten në Davos, ka thelluar ndarjet brenda Evropës dhe se perspektiva për të ardhmen nuk është e lehtë.

Duke folur për gazetarët në Davos, Vuçiç tha se shumë vende të Bashkimit Evropian ose nuk po marrin pjesë në këtë iniciativë, ose ende nuk janë deklaruar lidhur me të. “Ky Bord i Paqes, para së gjithash, e ka ndarë edhe më shumë Evropën. E ardhmja nuk do të jetë e thjeshtë”, theksoi ai.

I pyetur për rëndësinë e Bordit të Paqes në nivel global, Vuçiç u shpreh se ende nuk është plotësisht e qartë se çfarë roli do të ketë kjo strukturë e re. Sipas tij, ekzistojnë interpretime se Bordi mund të funksionojë si një organizatë paralele me Kombet e Bashkuara, por ai dyshon se një gjë e tillë është e realizueshme lehtë.

“Kina vetëm ka konfirmuar se ka marrë ftesë, ndërsa Franca, Gjermania dhe Italia nuk marrin pjesë. Mbetet të shihet se cilat do të jenë detyrat konkrete të Bordit”, shtoi Vuçiç.

Bordi i Paqes, i cili do të drejtohet nga presidenti amerikan Donald Trump për një periudhë të pacaktuar, ishte konceptuar fillimisht për rindërtimin e Gazës pas luftës dyvjeçare ndërmjet Izraelit dhe militantëve palestinezë. Megjithatë, misioni i tij është zgjeruar për të përfshirë edhe konflikte të tjera globale.

Disa aleatë tradicionalë evropianë të Shteteve të Bashkuara kanë hezituar t’i bashkohen kësaj nisme, me përjashtim të Kosovës dhe Shqipërisë. Ndërkohë, asnjë nga katër anëtarët e tjerë të përhershëm të Këshillit të Sigurimit të OKB-së nuk ka pranuar ende ftesën për t’u bërë pjesë e Bordit të Paqes, mes shqetësimeve se kjo strukturë e re mund të zbehë rolin e Kombeve të Bashkuara.