Jamie Dimon jep sërish alarmin për Europën dhe këtë herë e thotë troç, pa përdorur diplomaci.

Duke folur në Reagan National Defence Forum, drejtori ekzekutiv i JP Morgan Chase paralajmëroi se Europa ka një problem serioz dhe i vuri theksin burokracisë së ngadaltë që po i shtyn bizneset, kapitalin dhe risitë të shkojnë gjetkë. Sipas këndvështrimit të tij, ky nuk është vetëm problem europian, ai prek drejtpërdrejt Amerikën përmes tregtisë, investimeve dhe stabilitetit global.

Jamie Dimon e mbështeti këtë me shifra. Gjatë dekadës së fundit, PBB-ja e Europës ka rënë nga rreth 90% e prodhimit të SHBA-së në rreth 65%, një rënie që ai e sheh si sinjal të qartë të humbjes së konkurrueshmërisë.

Megjithatë, JPMorgan nuk po tërhiqet. Banka po zgjerohet në mënyrë agresive, përfshirë ndërtimin e një selie të re gjigante në Londër, e cila do të jetë qendra e operacioneve të saj në Europë, Lindjen e Mesme dhe Afrikë.

Mesazhi është i qartë: shenjat paralajmëruese mund të bashkëjetojnë me mundësitë, por vetëm për ata që veprojnë me vendosmëri, ndërsa të tjerët mbeten të bllokuar.

Pjesë nga intervista e tij:

Moderatorja:A mendon se Europa, nga këndvështrimi yt, dëshiron të punojë me Amerikën tani?

Jamie Dimon:Unë mendoj se Europa ka një problem të vërtetë. E sheh botën dhe e kupton që ka “pllaka tektonike” që po lëvizin: inteligjenca artificiale; armiku është lart në satelitë dhe brenda sistemeve tona kompjuterike; bota ka ndryshuar. Pllaka tjetër është ngritja e Kinës, deficite të mëdha globale dhe programe sociale që ndoshta nuk mund të mbahen për një kohë të gjatë. Pra, Europa ka një problem.

Ata arritën diçka të jashtëzakonshme kur u bashkuan me euron dhe BE-në dhe thanë: le të jetojmë në paqe, jo në luftë. Ata patën Luftën e Parë dhe të Dytë Botërore, por edhe Luftërat Franko-Pruse, Luftërat Napoleonike, Luftën Njëqindvjeçare, Luftën e Trëndafilave. Të jetosh në paqe është gjë e mirë, por procesi u ngadalësua. Ata nuk e përfunduan kurrë tregun e përbashkët. Duhen 27 shtete për të marrë një vendim.

Ata e lanë ushtrinë të bjerë ndjeshëm. Sistemi është shumë burokratik, dhe kjo është një nga arsyet pse Britania doli nga BE-ja, gjë që, sipas meje, është e keqe për të dyja palët. Duhet të jemi të sinqertë për këtë. Këto lëvizje mund të ndodhin gjatë 20 viteve, por nëse ndonjëherë shkruajmë një libër se si humbi Perëndimi, arsyeja do të jetë kjo.

Do të jetë sepse nuk i rregulluam punët këtu, sepse nuk patëm ushtrinë më të fortë në botë dhe sepse lejuam që Europa të shpërbëhej. Prandaj kam një këndvështrim pak ndryshe për Europën. Ata kanë shumë gjëra të mira, por nga 90% e PBB-së së Amerikës kanë rënë në 65%. Kjo nuk është se Amerika u bëri diçka të keqe. Është për shkak të burokracisë së tyre, kostove të tyre.

Ata bëjnë disa gjëra shumë të mira me rrjetat e sigurisë sociale, por kanë larguar biznesin, investimet dhe risitë. Tani po kthehet disi. Mendoj se udhëheqësit, Merz, Macron, Meloni, Starmer, e dinë këtë. Thjesht mendoj se politika është shumë, shumë e vështirë.

Prandaj, fragmentimi i Europës, nëse ndodh, është pikërisht ajo që duan disa nga kundërshtarët tanë. Ata duan të kthehen në një botë si para Luftës së Parë Botërore, ku secili mendon vetëm për veten. Secili ka interesa të ndryshme të sigurisë kombëtare, qoftë ushqimi, energjia apo uji. Dhe Kina është një vend shumë i madh që dëshiron marrëveshje dypalëshe me çdo shtet.

Nëse Europa fragmentohet, atëherë ideja “Amerika e para” nuk do të funksionojë më. Kjo do të na dëmtojë më shumë se këdo tjetër, sepse Europa është një aleat madhor në çdo aspekt, përfshirë vlerat e përbashkëta, të cilat janë shumë të rëndësishme.

Prandaj, mendoj se duhet të përdorim aftësitë, forcën, ndikimin, demokracinë, tregtinë dhe investimet amerikane për t’i nxitur ata ta bëjnë këtë në interesin e tyre: si ushtarakisht, ashtu edhe ekonomikisht. Dhe ekonomia është po aq e rëndësishme.

View this post on Instagram

A post shared by Entrepreneurship | Business | Startup (@_business_mindsett_)