Presidenti i Shteteve të Bashkuara, Donald Trump, ka deklaruar se SHBA nuk ka asnjë qëllim të përdorë forcë ushtarake lidhur me Groenlandën, duke theksuar se Uashingtoni synon zgjidhje paqësore dhe përmes negociatave.

Në një deklaratë të bërë së fundmi, Trump iu drejtua edhe NATO-s, duke vlerësuar faktin se aleanca ka rritur investimet në mbrojtje. Ai theksoi se Shtetet e Bashkuara kanë kapacitete të mëdha ushtarake, por nuk kanë ndërmend t’i përdorin ato.

“Nuk do të arrijmë asgjë nëse vendos të përdor forcë të tepërt. Do të ishim të pandalshëm, por nuk do ta bëjmë këtë,” u shpreh Trump.

Presidenti amerikan këmbënguli disa herë se përdorimi i forcës nuk është pjesë e planeve të tij. “Nuk kam pse të përdor forcë, nuk dua të përdor forcë, nuk do të përdor forcë,” tha ai.

Sipas Trump, ajo që SHBA po kërkon është vetëm “një vend i quajtur Groenlandë”, duke nënvizuar se interesi amerikan për këtë territor lidhet me çështje strategjike dhe të sigurisë, e jo me veprime ushtarake apo konflikte.

"Po kërkoj negociata të menjëhershme për të blerë Groenlandën", thotë Trump.