Mbi 39 viktima nga tragjedia në Spanjë/ Gjithçka që dimë deri më tani për përplasjen mes trenave

Të paktën 39 persona kanë humbur jetën dhe 12 të tjerë ndodhen në kujdes intensiv pasi dy trena u përplasën të dielën në mbrëmje në jug të Spanjës. Kryeministri Pedro Sánchez e cilësoi ngjarjen si “një natë dhimbjeje të thellë për vendin”.

Sipas autoriteteve, një tren me shpejtësi të lartë i kompanisë private Iryo, që udhëtonte nga Malaga drejt Madridit, doli nga binarët rreth orës 19:40 pranë komunës Adamuz, në provincën e Kordobas. Treni kaloi në shinën e kundërt, ku u përplas me një tren tjetër që po vinte përballë, i operuar nga kompania shtetërore Renfe, i cili po udhëtonte nga Madridi drejt Huelvës.

Descarrila un tren en Córdoba #Adamuz desplazados efectivos sanitarios @E112Andalucia

Circulan imágenes y vídeos del accidente. pic.twitter.com/97WWdsxy7L

— Pablo Fernández (@SantaLeonor13) January 18, 2026

Si pasojë e përplasjes, edhe treni i dytë doli nga shinat dhe përfundoi në një argjinaturë. Iryo njoftoi se rreth 300 persona ndodheshin në bord në momentin e aksidentit, ndërsa raportimet e mediave spanjolle sugjerojnë se në të dy trenat ndodheshin rreth 400 pasagjerë.

Shërbimet e emergjencës, Guardia Civile dhe zjarrfikësit po punojnë intensivisht në vendngjarje për evakuimin e pasagjerëve dhe nxjerrjen e të bllokuarve. Të hënën në mëngjes, autoritetet në Andaluzi bënë të ditur se 122 persona ishin trajtuar për lëndime, 48 prej tyre mbeteshin të shtruar në spital dhe 12 ndodheshin në njësitë e kujdesit intensiv.

Dëshmitarët përshkruan skena paniku. “Ka shumë të lënduar – ende po dridhem”, tha për El País María San José, një pasagjere në trenin e parë. Një tjetër dëshmitar për RTVE tregoi se një nga vagonët ishte përmbysur plotësisht, ndërsa pasagjerët kishin thyer xhamat me çekiçë emergjence për të dalë jashtë.

Shefi i zjarrfikësve të Kordobas, Paco Carmona, deklaroi se evakuimi i trenit Iryo u krye brenda pak orësh, por vagonët e Renfe ishin dëmtuar rëndë, me metal dhe sedilje të shtrembëruara. “Ka ende njerëz të bllokuar. Duhet të nxjerrim trupat për të arritur te kushdo që është ende gjallë”, tha ai, duke e cilësuar operacionin si tepër të ndërlikuar.

#BREAKING: Interior footage from a high-speed train derailment shows passengers waiting to be evacuated in Adamuz, Córdoba, Spain.#Spain pic.twitter.com/SjaCe12S8G

— JUST IN | World (@justinbroadcast) January 18, 2026

Ministri i Transportit, Óscar Puente, theksoi se shkaku i aksidentit ende nuk është përcaktuar, duke e quajtur “shumë të çuditshme” daljen nga shinat në një segment të drejtë të binarit, i cili ishte rinovuar në maj. Ai shtoi se shumica e viktimave dhe të plagosurve ndodheshin në dy vagonët e parë të trenit të dytë.

Ndërkohë, Adif ka pezulluar të gjitha shërbimet hekurudhore midis Madridit dhe Andaluzisë. Në Adamuz, një qytet me rreth 5,000 banorë, është ngritur një qendër pritjeje për pasagjerët, ku vendasit po ofrojnë ushqim dhe batanije, ndërsa temperaturat e natës zbresin rreth 6 gradë Celsius.

Ky është një nga aksidentet më të rënda hekurudhore në Spanjë në vitet e fundit. Aksidenti më vdekjeprurës i këtij shekulli ndodhi në korrik 2013 në Galici, kur humbën jetën 80 persona.