Koreja e Veriut: Testet e fundit të raketave, përfshinin sisteme të reja armësh hipersonike

Zotërimi i një arme hipersonike funksionale do t'i jepte Koresë së Veriut aftësinë për të depërtuar në mburojat mbrojtëse nga raketat e SHBA-së dhe Koresë së Jugut.

Koreja e Veriut tha të hënën se udhëheqësi Kim Jong-un vëzhgoi fluturime provë të raketave hipersonike dhe nënvizoi nevojën për të forcuar aftësinë parandaluese të luftës bërthamore të vendit, ndërsa rrit shfaqjet e armëve përpara konferencës së saj të madhe politike.

Koreja e Veriut raportoi për stërvitjen, një ditë pasi fqinjët e saj thanë se kishin zbuluar lëshime të shumta raketash balistike dhe e akuzuan Veriun për kryerjen e provokimeve.

Testet ndodhën vetëm disa orë përpara se Presidenti i Koresë së Jugut, Lee Jae Myung, të nisej drejt Kinës për një samit me Presidentin Xi Jinping.

Agjencia zyrtare Qendrore Koreane e Lajmeve (KCNA) tha se stërvitja e së dielës që përfshinte një sistem armësh hipersonik, kishte për qëllim të shqyrtonte gatishmërinë e tij, të përmirësonte aftësitë operacionale të fuqisë së zjarrit të trupave raketore dhe të vlerësonte aftësitë operacionale të parandalimit të luftës së vendit.

 “Përmes stërvitjes së sotme të lëshimit, mund të konfirmojmë se është kryer një detyrë shumë e rëndësishme teknologjike për mbrojtjen kombëtare”, tha Kim, sipas KCNA-së.

"Ne duhet të përmirësojmë vazhdimisht mjetet ushtarake, veçanërisht sistemet e armëve sulmuese."

Zotërimi i një arme hipersonike funksionale, do t'i jepte Koresë së Veriut aftësinë për të depërtuar në mburojat mbrojtëse nga raketat e SHBA-së dhe Koresë së Jugut.

Në vitet e mëparshme, Koreja e Veriut ka kryer një sërë testesh për ta përvetësuar atë, por shumë ekspertë të huaj vënë në dyshim nëse raketat e testuara kanë arritur shpejtësinë dhe manovrueshmërinë e dëshiruar gjatë fluturimeve.

Në javët e fundit, Koreja e Veriut testoi ato që i quajti raketa strategjike me rreze të gjatë veprimi dhe raketa të reja kundërajrore, si dhe publikoi foto që tregojnë përparim të dukshëm në ndërtimin e nëndetëses së saj të parë me energji bërthamore.

Vëzhguesit thonë se Koreja e Veriut synon të demonstrojë ose të rishikojë arritjet e saj në sektorin e zhvillimit të armëve, përpara kongresit të Partisë së Punëtorëve në pushtet, i pari i këtij lloji në pesë vjet.

Vëmendja është përqendruar nëse Kim do ta përdorë kongresin për të vendosur një qasje të re në marrëdhëniet me SHBA-në, dhe për të rinisur bisedimet e pezulluara prej kohësh për denuklearizimin.

Lëshimet e fundit pasuan operacionin e guximshëm ushtarak amerikan të së shtunës, që rrëzoi nga pushteti udhëheqësin venezuelian Nicolás Maduro dhe e solli atë në SHBA për t'u përballur me akuzat për konspiracion narkoterrorizëm.

Koreja e Veriut e kritikoi ashpër operacionin, duke thënë se ai tregon përsëri "natyrën mashtruese dhe brutale të SHBA-së".

Shumë ekspertë thonë se operacioni amerikan ka të ngjarë ta bëjë Kim-in të shtyjë përpara zgjerimin e mëtejshëm të aftësive të tij të armëve bërthamore, të cilat ai mendon se garantojnë mbijetesën e qeverisë së tij dhe sovranitetin shtetëror përballë armiqësive të udhëhequra nga SHBA-të.

Gjatë stërvitjes së lëshimit të raketës të së dielës, Kim mbrojti përpjekjen e tij për një program bërthamor më të fortë.

"Arsyeja pse është e nevojshme, ilustrohet nga kriza e fundit gjeopolitike dhe ngjarjet e ndërlikuara ndërkombëtare", tha ai./ Euronews.