Macron nuk e miraton metodën e përdorur nga SHBA-të për arrestimin e Maduros

Presidenti francez, Emmanuel Macron kritikoi të hënën "metodën" e përdorur nga Shtetet e Bashkuara për të arrestuar presidentin venezuelian, Nicolás Maduro dy ditë më parë.

Kjo “as nuk mbështetet dhe as nuk miratohet” nga Franca, tha Macron gjatë një takimi të kabinetit në Paris, tha zëdhënësja e qeverisë Maud Bregeon.

Zëdhënësja nuk specifikoi nëse Macron po e kritikonte sulmin e SHBA-së si të tillë apo vetëm mënyrën se si u ndalua Maduro.

"Ne mbrojmë të drejtën ndërkombëtare dhe lirinë e popujve", tha presidenti, sipas Bregeon.

Komentet e Macronit vijnë pas acarimit në Francë për shkak të reagimit të tij fillestar ndaj sulmit të SHBA-së ndaj Venezuelës, i cili kulmoi me kapjen e Maduros dhe gruas së tij, Cilia Flores, dhe transportimin e tyre në Nju Jork.

Pa kritika ndaj veprimit të SHBA-së, Macron tha të shtunën se populli venezuelian mund të gëzohet që është çliruar nga diktatura. Maduro kishte shkelur rëndë dinjitetin e popullit të tij, shkroi Macron në X.

Fillimisht, kritikat ndaj veprimit të SHBA-së erdhën vetëm nga Ministri i Jashtëm francez, Jean-Noël Barrot.

“Operacioni ushtarak që çoi në arrestimin e Nicolás Maduro shkel parimin e mospërdorimit të forcës mbi të cilin bazohet e drejta ndërkombëtare”, tha Barrot, pasi u përhap lajmi për operacionin amerikan.

Franca kujton se asnjë zgjidhje politike e qëndrueshme, nuk mund të imponohet nga jashtë dhe se vetëm popujt sovranë vendosin për të ardhmen e tyre.

Perspektivat e ndryshme të presidentit dhe ministrit të jashtëm mbi ngjarjet në Venezuelë shkaktuan habi në Francë.

Megjithatë, deklarata e ministrit ishte koordinuar me presidentin, tha Bregeon./ DPA News.