Uganda mohon planet për të bllokuar internetin gjatë zgjedhjeve

Autoritetet e Ugandës kanë mohuar raportet se po planifikojnë të ndërpresin aksesin në internet gjatë zgjedhjeve të javës së ardhshme.

Kandidati kryesor i opozitës javën e kaluar përsëriti pretendimet, se qeveria do të bllokonte internetin për të parandaluar mobilizimin e mbështetësve të tij dhe ndarjen e rezultateve të zgjedhjeve.

Të premten, ofruesi i internetit satelitor Starlink kufizoi shërbimet e tij në Ugandë pas një urdhri nga rregullatori i komunikimeve, duke nxitur këto shqetësime.

Presidenti Yoweri Museveni po kërkon të zgjasë sundimin e tij 40-vjeçar në zgjedhjet e 15 janarit. Sfiduesi i tij më i fortë pritet të jetë Robert Kyagulanyi, i njohur gjerësisht si Bobi Wine, një ish-yll i muzikës pop.

Kjo është një përsëritje e zgjedhjeve të vitit 2021, të cilat panë protesta të gjera me dhjetëra të vrarë, ndërsa interneti u ndërpre për katër ditë.

Ndërkohë, qeveria ka ndaluar transmetimet drejtpërdrejt të trazirave, "procesioneve të paligjshme" dhe incidenteve të tjera të dhunshme përpara zgjedhjeve, duke argumentuar se këto mund të "përshkallëzojnë tensionet dhe të përhapin panik".

Megjithatë, kreu i Komisionit të Komunikimeve të Ugandës (UCC) tha se raportet për një ndërprerje të mundshme të internetit ishin "thjesht thashetheme", duke këmbëngulur se roli i komisionit ishte të garantonte lidhje të pandërprerë në të gjithë vendin.

"Deri më tani, nuk ka asnjë rezolutë për të fikur internetin", tha Drejtoresha Ekzekutive e UCC-së, Nyombi Thembo, për Capital FM me seli në Kampala.

Kjo pikë u ngrit edhe nga Amina Zawedde, zyrtarja më e lartë në Ministrinë e Komunikacionit dhe Udhëzimit Kombëtar.

"Qeveria nuk ka njoftuar, drejtuar ose zbatuar ndonjë vendim për të mbyllur internetin gjatë periudhës zgjedhore", tha ajo, duke i përshkruar raportet si të rreme, mashtruese dhe që mund të krijojnë frikë.

Ajo paralajmëroi më tej kundër përhapjes së përmbajtjes së rreme ose nxitëse.

"Platformat digjitale nuk janë të përjashtuara nga ligji", tha Zawedde, duke shtuar se Akti i Keqpërdorimit të Kompjuterëve zbatohet plotësisht për sjelljen online, duke përfshirë përhapjen e informacionit të rremë dhe komunikimin fyes.

Ajo theksoi gjithashtu se vetëm Komisioni Zgjedhor kishte mandatin për të shpallur rezultatet, dhe transmetimi i rezultateve të paverifikuara ose të parakohshme ishte i paligjshëm.

“Liria e shprehjes duhet të ushtrohet me përgjegjësi dhe brenda kuadrit të ligjit”, shtoi ajo.

Pavarësisht garancive, partia kryesore e opozitës, Platforma e Unitetit Kombëtar (NUP), ka lançuar një aplikacion për monitorimin e votave jashtë linje në rast të ndërprerjes së votimit. Aplikacioni, i quajtur Bitchart, u prezantua nga kreu i NUP-së, Bobi Wine.

Ai tha se aplikacioni përdorte teknologjinë Bluetooth, për të ndarë imazhe të formularëve të rezultateve nga qendrat e votimit dhe të dhënat e votimit pa qasje në internet.

"Siç e dimë të gjithë, regjimi po komploton një mbyllje të internetit, siç ka bërë në zgjedhjet e kaluara, për të bllokuar komunikimin dhe për të penguar qytetarët të organizohen, të verifikojnë rezultatet dhe të kërkojnë llogaridhënie", tha ai në fjalimin e tij të Vitit të Ri.

Mes tensioneve politike në rritje, Amnesty International ka akuzuar forcat e sigurisë të Ugandës, për përdorimin e torturës dhe arrestimeve arbitrare për të frikësuar mbështetësit e opozitës. Grupi thotë se ka prova për rrahje dhe sulme me gaz lotsjellës ndaj mbështetësve të Platformës së Unitetit Kombëtar të Bobi Wine. BBC ka kërkuar një përgjigje.

Museveni erdhi në pushtet për herë të parë në vitin 1986, kur forcat e tij rebele marshuan në kryeqytetin Kampala. Që atëherë ai është zgjedhur gjashtë herë mes akuzave të opozitës për mashtrim dhe kërcënim, të cilat qeveria i ka mohuar./ BBC.