Vatikani ka njoftuar se Richard Moth do të jetë Kryeipeshkvi i ri i Westminster-it, duke e bërë atë kreun e Kishës Katolike në Angli dhe Uells.

Ai pason në këtë detyrë kardinalin Vincent Nichols, i cili e ka mbajtur këtë rol që nga viti 2009 dhe është tërhequr në moshën 80-vjeçare.

Për 10 vitet e fundit Richard Moth ka qenë Ipeshkv i Arundel dhe Brighton, dhe më parë ka shërbyer si Ipeshkv i Forcave.

Si Kryeipeshkv i Westminster-it, ai do të bëhet president i Konferencës së Ipeshkvijve të Anglisë dhe Uellsit dhe do të udhëheqë rreth gjashtë milion katolikë.

Siç shkruan BBC, kardinali Nichols arriti moshën e pensionit kur ishte 75 vjeç, por iu kërkua nga Papa Françesku të vazhdonte të qëndronte në detyrë. Në maj ai mori pjesë në konklavën që zgjodhi Papa Leonin XIV.

Kërkimi për një zëvendësues të kardinalit Nichols u drejtua nga ambasadori papal në Mbretërinë e Bashkuar, i cili paraqiti një listë kandidatësh të mundshëm Papës Leon.

Më herët këtë javë, kryeipeshkvi Moth publikoi një deklaratë të përbashkët duke bërë thirrje për empati ndaj “atyre që vijnë në këtë vend për sigurinë e tyre”, duke u kujtuar katolikëve se familja e Jezusit u largua në Egjipt si refugjatë.

Ai ka qenë një nga ipeshkvijtë që ka udhëhequr përgjigjen e Kishës ndaj çështjeve të drejtësisë sociale në Mbretërinë e Bashkuar, përfshirë vlerësimin e heqjes së kufirit të përfitimit për dy fëmijë.

Duke folur në një konferencë për shtyp të premten, kardinali Nichols tha se pasardhësi i tij do të sillte “përvojë dhe mençuri praktike në jetën e dioqezës”.

Kryeipeshkvi Moth tha: “Detyra ime e parë këtu është të njoh të gjithë… të njoh priftërinjtë dhe njerëzit, të njoh shkollat, të njoh jetën e kësaj dioqeze të mrekullueshme këtu në Westminster”.

Ai tha se fokusi i tij ka qenë “vazhdimisht në fushën e drejtësisë sociale”, duke shtuar se kishte një “shqetësim të veçantë për burgjet”.

Kryeipeshkvi Moth do të përballet me sfidën e rënies së numrit të njerëzve që marrin pjesë në kisha në nivel kombëtar, megjithëse ka rritje në disa kisha me katolikë emigrantë.