Një emigrant i paligjshëm në Virxhinia është arrestuar për vrasje vetëm një ditë pasi u lirua nga burgu për një çështje tjetër nga një prokuror progresist, fushata e të cilit është financuar nga George Soros.

Steve Descano, prokurori i Qarkut Fairfax në Virxhinia, pushoi të gjitha akuzat ndaj një emigranti të paligjshëm 23-vjeçar nga El Salvadori, me precedentë penalë, duke e lënë të lirë në komunitet. Vetëm një ditë më pas, ai u arrestua nga policia si i dyshuar për një vrasje, raportoi media lokale WJLA.

Departamenti i Policisë së Qarkut Fairfax njoftoi të mërkurën pasdite se kishte arrestuar Marvin Morales-Ortezin si të dyshuarin për një të shtënë vdekjeprurëse që ndodhi jashtë një shtëpie në Reston, më herët gjatë ditës.

Morales-Ortez kishte një listë të gjatë arrestimesh për vepra penale në këtë qark, por u lirua nga burgu të martën pasi Zyra e Prokurorit të Qarkut Fairfax pushoi akuzat për nxjerrje arme dhe për sulm e plagosje të një personi.

Fushata e Descanos për postin aktual, si zyrtari më i lartë i zbatimit të ligjit në një qark të Virxhinias pranë Uashingtonit, u financua në vitin 2019 nga Justice and Public Safety PAC, donatori i vetëm i të cilit është George Sorosi.

Sorosi është një miliarder i njohur për financimin e fushatave të kandidatëve progresistë në Shtetet e Bashkuara dhe në mbarë botën.

Studiues të fondacionit konservator Heritage Foundation në Uashington shkruan në vitin 2020 se, për të siguruar mbështetjen financiare të Sorosit, "prokurorë problematikë si Descano i binden lëvizjes sepse ajo financon fushatat e tyre… Pasi zgjidhen, pritet të mbajnë premtimet."

Morales-Ortez u akuzua për sulm të dhunshëm në vitin 2020; për një tjetër sulm të dhunshëm në vitin 2023, bashkë me prishje të rendit publik; për vjedhje në vitin 2024; si dhe për drejtim ose nxjerrje arme, sulm dhe plagosje të një viktime në shtator 2025. Ai u dënua vetëm për vjedhjen.

Ai ishte akuzuar gjithashtu për vrasje të shkallës së parë në vitin 2021 dhe kaloi rreth një vit e gjysmë në burg në pritje të gjyqit. Megjithatë, akuzat më vonë u pushuan dhe një i dyshuar tjetër u dënua për vrasjen.

Një zëdhënës i Zyrës së Prokurorit të Qarkut Fairfax i tha WJLA se u vendos të mos mbahej më në paraburgim i dyshuari pasi zyra "nuk ishte në gjendje të vazhdonte çështjen [këtë javë], sepse viktima u tha policëve se ndodhej jashtë vendit dhe nuk do të vinte në gjykatë për të bashkëpunuar me procedurat".

"Fatkeqësisht, pa dëshminë e domosdoshme të viktimës, nuk mund ta çonim më tej çështjen," tha zyrtari i gjykatës së Qarkut Fairfax.

Departamenti i Sigurisë Kombëtare dhe Shërbimi i Emigracionit dhe Doganave të SHBA-së nuk iu përgjigjën kërkesave për koment. / Washington Examiner – Syri.net