Presidenti Rus Vladimir Putin të mërkurën sulmoi udhëheqësit evropianë, duke i quajtur ata “derra të vegjël” dhe tha se Rusia do t’i arrinte qëllimet e saj territoriale në Ukrainë qoftë përmes diplomacisë apo me forcë ushtarake.

Duke folur në takimin vjetor me ministrinë e mbrojtjes, Putin tha se qëllimet e asaj që Moska e quan “operacioni i saj special ushtarak” do të përmbushen “pa kushte”.

“Nëse ata nuk duan një diskutim thelbësor, atëherë Rusia do të çlirojë tokat e saj historike në fushën e betejës”, tha ai.

Putini pretendoi se administrata e mëparshme amerikane e kishte “drejtuar qëllimisht situatën drejt një konflikti të armatosur” , duke shtuar se Uashingtoni besonte se Rusia mund të dobësohej ose edhe të shkatërrohej brenda një periudhe të shkurtër kohore.

Më pas ai sulmoi udhëheqësit evropianë, duke i akuzuar ata se po i bashkoheshin administratës së Joe Biden.

“Derrat e vegjël të Evropës iu bashkuan menjëherë punës së administratës së mëparshme amerikane, duke shpresuar të përfitonin nga rënia e vendit tonë”, tha Putin.

Komentet e ashpra të Putinit erdhën ndërsa zyrtarët amerikanë pohuan se bisedimet e mëparshme me Ukrainën në Berlin kishin zgjidhur rreth 90% të çështjeve më të vështira.

Putini ka këmbëngulur vazhdimisht që Kievi t’i lëshojë pjesët e mbetura të rajonit lindor të Donbasit që janë ende nën kontrollin ukrainas, një kërkesë që Shtëpia e Bardhë herë pas here duket se e mbështet, por që Ukraina e ka refuzuar kategorikisht. Moska gjithashtu ka kërkuar kufizime të rrepta mbi ushtrinë e Ukrainës, një ndalim për trupat perëndimore në territorin ukrainas dhe një fund të mbështetjes ushtarake perëndimore.

Udhëheqësi rus të mërkurën mohoi gjithashtu se Moska po planifikonte të pushtonte territorin e NATO-s, duke pretenduar në vend të kësaj se aleanca kishte filluar përgatitjet për një përballje të mundshme ushtarake me Rusinë, me synim vitin 2030.