Një panel federal gjyqësor në Shtetet e Bashkuara vendosi të hënën, 15 dhjetor 2025, të bashkojë në një proces të vetëm dhjetëra padi kundër kompanive farmaceutike Novo Nordisk dhe Eli Lilly, ku pretendohet se disa pacientë kanë humbur pjesërisht ose plotësisht shikimin pas përdorimit të barnave të njohura për diabetin dhe humbjen në peshë, si Ozempic dhe Wegovy.

Sipas Reuters, Paneli Gjyqësor i SHBA-ve për Proceset Multidistriktore vendosi që këto çështje të trajtohen si një litigacion i veçantë masiv në Gjykatën Federale të Filadelfias, dhe jo të përfshihen në procesin ekzistues që lidhet me efekte anësore gastrointestinale nga të njëjtat barna.

Edhe pse bëhet fjalë për dëmtime të ndryshme shëndetësore, paneli theksoi se do të ketë mbivendosje mes dy proceseve gjyqësore. Për këtë arsye, të dyja MDL-të do të trajtohen paralelisht nga e njëjta gjyqtare federale, Karen Marston.

Paditë e reja pretendojnë se barnat, përfshirë Ozempic, Wegovy dhe Saxenda nga Novo Nordisk, si dhe Trulicity nga Eli Lilly, mund të shkaktojnë neuropati optike ishemike anteriore jo-arteritike, një gjendje që lidhet me reduktimin e qarkullimit të gjakut në nervin optik dhe që mund të çojë në verbëri.

Barnat në fjalë i përkasin klasës së agonistëve GLP-1, të zhvilluar fillimisht për trajtimin e diabetit, por që sot përdoren gjerësisht edhe për humbje peshe. Ato veprojnë duke imituar një hormon që ngadalëson tretjen dhe rrit ndjesinë e ngopjes. Sipas një studimi të Qendrave Amerikane për Kontrollin dhe Parandalimin e Sëmundjeve, më shumë se një në katër të rritur me diabet në SHBA-të i përdorin këto barna.

Aktualisht, rreth 30 padi për probleme të shikimit janë depozituar në gjykatat federale dhe mbi 40 të tjera në gjykatat shtetërore. Këto çështje nisën të shtohen pas një studimi të publikuar në korrik 2024, i cili sugjeroi një lidhje të mundshme mes barnave GLP-1 dhe kësaj gjendjeje okulare.

Ndërkohë, procesi tjetër masiv për gastroparezë, një paralizë e traktit gastrointestinal, përfshin afro 3 mijë padi. Kompanitë farmaceutike i kanë mohuar vazhdimisht akuzat, duke argumentuar se rreziqet janë të njohura publikisht dhe se ndryshimi i dizajnit të barnave kërkon miratimin e Administratës Amerikane të Ushqimit dhe Barnave.