Belgjika kundërshtoi të hënën, lëshimet e propozuara të Komisionit Evropian për të zhbllokuar një kredi prej 210 miliardë eurosh për Ukrainën, e financuar nga asetet e ngrira ruse, duke shuar shpresat e BE-së për të siguruar një marrëveshje në kohë për samitin e udhëheqësve të së enjtes.

Me dy ditë që kanë mbetur deri në përfundim të procesit, Komisioni po bën një përpjekje të fundit për të bindur vendet anëtare të BE-së që të mbështesin kredinë, në mënyrë që miliarda euro në rezervat ruse të mbajtura në bankën Euroclear në Bruksel, të mund të lirohen për të mbështetur ekonominë e Kievit të shkatërruar nga lufta.

27 të dërguarit e BE-së do të vazhdojnë diskutimet mbi skemën më vonë të martën, ndërsa bisedimet për t'i dhënë fund luftës pothuajse katërvjeçare të Rusisë në Ukrainë, arritën njëfarë përparimi gjatë një takimi të udhëheqësve perëndimorë dhe të dërguarve të SHBA-së në Berlin të hënën.

Pas disa ditësh negociatash mbi asetet, Komisioni të hënën sugjeroi ndryshime ligjore në propozimin e tij për të siguruar mbështetjen politike nga Belgjika.

Sipas tekstit të fundit të parë nga POLITICO, ai dha garanci ligjore se, në çdo skenar, Belgjika mund të përfitojë deri në 210 miliardë euro, nëse përballet me pretendime ligjore ose hakmarrje nga Rusia. Gjithashtu, ai deklaroi se asnjë para nuk duhet t'i jepet Ukrainës përpara se vendet e BE-së të ofrojnë garanci financiare, që mbulojnë të paktën 50 përqind të pagesës.

Në një lëshim të mëtejshëm, Komisioni udhëzoi të gjitha vendet e BE-së që t’i japin fund traktateve të tyre dypalëshe të investimeve me Rusinë, për t’u siguruar që Belgjika të mos lihet vetëm për t’u përballur me hakmarrjen nga Moska.

Por Belgjika tha se sigurimet nuk ishin të mjaftueshme gjatë një takimi të ambasadorëve të BE-së të hënën në mbrëmje, thanë katër diplomatë të BE-së për POLITICO.

“Nuk do të ketë marrëveshje deri në EUCO [Këshilli Evropian]”, tha një diplomat i BE-së, i cili, ashtu si të tjerët i cituar në këtë artikull, iu dha anonimiteti për të folur lirisht.

Qeveria belge po kundërshton përdorimin e aseteve ruse nga frika se do të jetë përgjegjëse për të shlyer shumën e plotë, nëse Rusia përpiqet të tërheqë paratë. Por në një ndërlikim të mëtejshëm, katër vende të tjera - Italia, Malta, Bullgaria dhe Çekia - mbështetën kërkesën e Belgjikës për të eksploruar financim alternativ për Ukrainën, siç është borxhi i përbashkët.

Ndërsa Franca vazhdon të mbështesë publikisht planin e aseteve të ngrira — Ministri i Evropës i vendit, Benjamin Haddad, tha në Bruksel të martën se Parisi e mbështet atë — një person pranë Presidentit francez Emmanuel Macron tha se Parisi ishte “neutral” nëse Evropa duhet të shfrytëzonte miliardat e Moskës apo të drejtohej te eurobonot, për të parandaluar falimentimin e Ukrainës.

Mbështetësit e skemës — si Gjermania — këmbëngulin se nuk ka alternativë të vërtetë ndaj përdorimit të aseteve ruse. Ata thonë se borxhi i përbashkët nuk është i realizueshëm sepse kërkon unanimitet — që do të thotë se kryeministri i Hungarisë, Viktor Orbán, i cili prej kohësh ka qenë skeptik ndaj mbështetjes për Ukrainën, mund ta bllokojë iniciativën.

“Le të mos e mashtrojmë veten. Nëse nuk ia dalim mbanë, aftësia e Bashkimit Evropian për të vepruar do të dëmtohet rëndë për vite me radhë, nëse jo për një periudhë më të gjatë”, tha të hënën kancelari gjerman Friedrich Merz.

Por kjo nuk është bindëse për të gjitha vendet e BE-së. Kritikët pretendojnë se Gjermania këmbëngul në përdorimin e aseteve ruse, sepse është ideologjikisht kundër borxhit të përbashkët të BE-së.

“Normativa është se Hungaria është kundër borxhit të përbashkët [për Ukrainën]. Realiteti është se ata që kursejnë, janë kundër borxhit të përbashkët”, tha një diplomat i BE-së./ Politico.