Presidenti Donald Trump nënshkroi të hënën një urdhër ekzekutiv, që e klasifikon fentanilin si armë të shkatërrimit në masë, duke i dhënë qeverisë amerikane fuqi shtesë ligjore në përpjekjet e saj për të luftuar trafikimin e paligjshëm të drogës sintetike.

Urdhri ekzekutiv citon vdekshmërinë e drogës, e cila vret dhjetëra mijëra amerikanë çdo vit, dhe faktin se grupet kriminale transnacionale që administrata Trump i ka përcaktuar si organizata terroriste të huaja, përdorin shitjen e fentanilit për të financuar aktivitete që dëmtojnë sigurinë kombëtare të SHBA-së.

Duke folur në Zyrën Ovale ndërsa nënshkroi urdhrin, presidenti tha se sasia e drogës që hyn në SHBA nga deti ka rënë me 94 përqind (shumica e drogës, përfshirë fentanilin, hyjnë në SHBA nëpërmjet porteve tokësore të hyrjes). Trump shtoi se flukset e drogës janë "një kërcënim i drejtpërdrejtë ushtarak për Shtetet e Bashkuara të Amerikës".

Administrata ka përqendruar burime të konsiderueshme në luftën kundër fentanilit, si pjesë e përpjekjeve të saj për të siguruar kufirin amerikan me Meksikën. Zyrtarë të lartë të administratës kanë argumentuar se kufizimet e rrepta të imigracionit dhe masat e sigurisë kufitare të vendosura nga Trump kanë çuar në një rënie të konsumit të brendshëm të fentanilit.

“Me një kufi të sigurt, jetë po shpëtohen çdo ditë, trafikimi i seksit ka rënë ndjeshëm, fentanili ka rënë ndjeshëm”, tha të hënën shefi i kufirit i Shtëpisë së Bardhë, Tom Homan.

Ndërkohë që klasifikimi i një narkotiku si një armë shkatërrimi në masë është një veprim presidencial pothuajse i pashembullt, ka pasur debat publik rreth karakterizimit të fentanilit në këtë mënyrë edhe më parë. Administrata Biden ishte përballur më parë me presion nga një kontingjent dypartiak prokurorësh të përgjithshëm, për ta klasifikuar fentanilin si një armë shkatërrimi në masë. Dhe fentanili, edhe në sasi të vogla, është mjaft i fuqishëm për të vrarë shumë shpejt një numër të madh njerëzish përmes mbidozave.

Droga sintetike, e cila ka disa përdorime të kufizuara ligjore farmakologjike, vjen kryesisht në Shtetet e Bashkuara nëpërmjet Meksikës, ku kartelet e drogës prodhojnë fentanil duke përdorur "kimikate pararendëse" të importuara nga Kina. Prodhimi i fentanilit po lulëzon gjithashtu në rajonin e Trekëndëshit të Artë të Azisë Juglindore, i cili përfshin vendet e Laosit, Mianmarit dhe Tajlandës. Fentanili mund të prodhohet lehtësisht në laboratorë të improvizuar, duke shtuar sfidën me të cilën janë përballur autoritetet në zhdukjen e prodhimit brenda kufijve të tyre.

Ndërkohë, administrata ka akuzuar kartelet që veprojnë në Venezuelë për trafikimin e fentanilit në Shtetet e Bashkuara si justifikim për përdorimin e forcës vdekjeprurëse kundër anijeve të dyshuara të drogës në Detin e Karaibeve. Venezuela, ndërsa shihet si një qendër për trafikimin e kokainës, nuk shihet si një kontribues i madh në trafikimin global të fentanilit.

Koha e përcaktimit është mbresëlënëse, ndërsa shtohen spekulimet se SHBA-të do të kryejnë sulme tokësore kundër objektivave të dyshuara të trafikimit të drogës në tokën venezueliane, si pjesë e fushatës së saj të presionit kundër Presidentit venezuelian Nicolás Maduro. Shpallja e fentanilit si armë e shkatërrimit në masë do t'i jepte SHBA-së një justifikim shtesë ligjor, për të përdorur forcën ushtarake kundër Venezuelës.

Pretendimet se Iraku ende zotëronte armë të shkatërrimit në masë u përdorën si justifikim ligjor për pushtimin e vendit të Lindjes së Mesme dhe përmbysjen e udhëheqësit të tij të atëhershëm Saddam Hussein nën administratën e George W. Bush.

SHBA-të kanë paralajmëruar gjithashtu më parë sulme ushtarake kundër karteleve të drogës kolumbiane dhe meksikane, dhe pritet që SHBA-të përfundimisht ta largojnë vëmendjen nga Venezuela, drejt kërcënimeve nga grupet në ato vende./ Politico.