Ish-presidenti i Koresë së Jugut, Yoon Suk Yeol, u akuzua nga hetuesit specialë të hënën se kishte planifikuar me kujdes shpalljen e gjendjes së jashtëzakonshme një vit më parë.

Yoon u përpoq qëllimisht të provokonte një përgjigje ushtarake nga Koreja e Veriut, për të krijuar një pretekst për vendosjen e gjendjes së jashtëzakonshme në vend, tha prokurori special Cho Eun Suk.

Cho tha se Yoon u përpoq ta përdorte një provokim të tillë për të justifikuar shpalljen e gjendjes së jashtëzakonshme dhe për të siguruar pushtetin e tij politik brenda vendit.

Mbrëmjen e 3 dhjetorit 2024, 64-vjeçari Yoon shpalli papritur gjendjen e jashtëzakonshme, duke e zhytur vendin në një krizë të thellë politike.

Ky veprim u shkaktua zyrtarisht nga një mosmarrëveshje mbi buxhetin kombëtar. Politikani konservator tha në atë kohë se hapi drastik, ishte i nevojshëm për të mbrojtur Korenë e Jugut nga opozita, të cilën e akuzoi se po vepronte kundër shtetit dhe se ishte infiltruar nga Partia Komuniste e Kinës. Nuk u paraqitën prova për të mbështetur këto pretendime.

Ekipi i udhëhequr nga Cho tha tani se hetimi i tij tregoi se Yoon kishte komplotuar për të vendosur ligjin ushtarak përmes një metode tjetër, të paktën që nga tetori 2023.

Hetuesit pretendojnë se Yoon dhe ministri i tij i atëhershëm i mbrojtjes urdhëruan një operacion të fshehtë me dronë brenda territorit të Koresë së Veriut, në një përpjekje për të provokuar hakmarrje dhe për të justifikuar gjendjen e jashtëzakonshme - megjithëse Pheniani nuk u përgjigj kurrë ushtarakisht.

Yoon tani është në gjyq, duke u përballur me akuza që përfshijnë kryengritje, një vepër e rëndë penale sipas ligjit të Koresë së Jugut dhe një vepër që mund të çojë në dënimin me vdekje.

Koreja e Jugut është udhëhequr që nga qershori nga Presidenti Lee Jae Myung, një politikan i qendrës së majtë dhe rival i hershëm i Yoon./ DPA News.