Dy aktivistë amerikanë u arrestuan më 12 dhjetor nga forcat izraelite në Bregun Perëndimor të pushtuar, ndërsa kundërshtonin zhvendosjen me forcë të një familjeje palestineze, sipas një deklarate nga Lëvizja Ndërkombëtare e Solidaritetit (ISM).

Irene Cho, nga Nju Jorku, dhe Trudi Frost, nga Bostoni, të cilat po ofronin vullnetarisht ndihmën e tyre në ISM, u ndaluan në fshatin al-Mughayyer, në verilindje të Ramallahut, ndërsa qëndronin me familjen Abu Hamam, e cila, sipas ISM, është përballur me "ngacmime dhe sulme të pandërprera nga kolonët izraelitë dhe forcat e armatosura, për më shumë se një vit".

Sipas lëvizjes, autoritetet izraelite ua revokuan lejet e qëndrimit aktivistëve, përmes një procedure të shkurtuar dhe i transferuan ata në burgun e Givonit pranë qytetit të Ramlës.

ISM tha se arrestimet erdhën pasi forcat izraelite pretenduan se paraqitën një "urdhër ushtarak njëmujor për mbylljen e zonës".

Hartat që shoqëronin urdhrin, sipas ISM-së, nuk e përfshinin rezidencën e Abu Hamamit në zonën e kufizuar, duke i bërë ndalimet të paligjshme.

Grupi i të drejtave të njeriut tha se dy aktivistët amerikanë po refuzojnë të bashkëpunojnë me deportimin, ndërsa avokatët e tyre sfidojnë ligjshmërinë e urdhrave të deportimit. Aktivistët pritet të përballen me një panel shqyrtimi të kujdestarisë brenda 72 orëve./ AA.