Bashkimi Europian ka vendosur të bëjë të përhershme sanksionet që bllokojnë asetet e Bankës Qendrore Ruse, duke i dhënë një bazë ligjore përdorimit të tyre të mundshëm për të financuar një hua prej 90 miliardë eurosh në ndihmë të Ukrainës.

Siç shkruan Corriere della Sera, vendimi u mor me shumicë të cilësuar, ndërsa Hungaria dhe Sllovakia votuan kundër. Italia, Belgjika, Malta dhe Bullgaria, megjithëse votuan pro, paralajmëruan se ky hap nuk duhet të interpretohet si precedent për politikën e jashtme dhe të sigurisë së BE-së.

Sanksionet, të cilat deri më tani rinovoheshin çdo gjashtë muaj me unanimitet, tashmë nuk kanë nevojë për rinovim. Megjithatë, ndalimi i transferimit të aktiviteteve të Bankës Qendrore Ruse drejt Moskës mbetet i përkohshëm, për të shmangur shkeljen e ligjit ndërkombëtar që ndalon konfiskimin e pasurive. Këshilli i BE-së e justifikoi vendimin duke iu referuar nenit 122 të Traktatit mbi funksionimin e Unionit, duke theksuar se masa u mor me urgjencë për të mbrojtur ekonominë europiane.

Reagimi i Moskës ishte i menjëhershëm. Banka Qendrore Ruse njoftoi se do të padisë kompaninë Euroclear, me seli në Bruksel, ku janë depozituar 185 nga 210 miliardë euro të aseteve të ngrira. Institucioni rus akuzon Euroclear se e pengon të disponojë fondet dhe titujt e saj.

Për më tepër, Rusia paralajmëroi se do të kundërshtojë çdo përdorim të paautorizuar të pasurive në gjykata kombëtare, ndërkombëtare dhe organizata të huaja, duke kërkuar dëmshpërblim të plotë për asetet e ngrira dhe të ardhurat e humbura.

Italia, Belgjika, Bullgaria dhe Malta kanë kërkuar nga Komisioni Europian dhe Këshilli të shqyrtojnë alternativa më të sigurta dhe në përputhje me ligjin ndërkombëtar, si mekanizma huaje të BE-së ose zgjidhje të përkohshme, për të garantuar vazhdimësinë e mbështetjes ndaj Ukrainës.